admin
NguMsilisi Dube
KULABANTWANA ababili besigabeni seKariangwe eBinga abagijinyiselwe esibhedlela ngaphambi kokumunya iluba elithiwa zindlebe zendlovu (elephant ear).
Isiga lesi senzakale mhlaka 8 Zibandlela ngesikhathi abantwana laba abaleminyaka yokuzalwa emine besele lomfowabo oleminyaka engu-12 ngekhaya.
Umfakazi oqotho oyisihlobo semuli le ubike ukuba abantwana laba babesele bebodwa ngakibo ngakho basala badlalisa amaluba la.
“Lapho okwakudlalela khona abantwana laba kwakugcwele amahlamvu eluba leli kukhanya ukuba yiwo ababewadlalisa baze bacina sebewadla.
“Senelisa kodwa ukuthi sibanathise uchago lokubakhiphisa andubana sibagijimisele esibhedlela ukuze bayehlolwa,” kutsho umfakazi lo.
UMthunywa wenelise ukukhuluma lonina wabantwana laba uNkosazana Mercy Ndlovu wathi kuliqiniso ukuba abantwana bakhe bagijinyiselwa esibhedlela kodwa uthe baphanga bakhitshwa.
“Ngavukela emasimini ngisiya hlakula. Ngangitshiye abantwana laba belomfowabo oleminyaka elitshumi lambili bedlala ngezwa sengibizwa ukuthi abantwabami sebegula. Ngabathola begonyuluka kukhanya ukuba badle ulutho oluthile.
“Ngabagabhisa qede lapho ngabanathisa uchago ukwenzela ukuthi ingcekeza yonke iphume. Ngabona kungcono ukuba bayehlolwa esibhedlela, ngenhlanhla bafika bakhitshwa ngalelo langa. Amaluba la ngahle ngawagamula ngawalahla,” kutsho uNksz Ndlovu.
Online Reporter