admin
YiNtatheli kaMthunywa
“Nkosi ngibone kungcono ukuba izilimo lezi zivuthelwe emlonyeni kulokuthi zidliwe zinyamazana zendle.” Lamazwi akhulunywe ngenye indoda ehlala eSiabuwa, eBinga ebanjwe itshontsha imfe kwenye insimu.
Indoda le engumsolwa u Inock Ndlovu (23) kubikwa yenze isiga lesi mhlaka-12 Zibandlela ngesikhathi isensimini kamamangala uMaryline Muleya oleminyaka yokuzalwa engu-34.
Umtshutshisi wodaba lolu uMnumzana Bruce Maphosa ubikele inkundla yeBinga emavikini adluleyo ukuba mhlaka-12 Zibandlela umsolwa wabanjwa ngumamangala etshontsha imfe qede wazigeza ngokuthi ubengafuni zitshabalaliswe zinyamazana zendle.
Kuzwakale ukuba ngelanga leli umamangala wavuka ekuseni walubhekisa emasimini akhe lapho alime khona isilimo somumbu kunye lemfe ukuze ayehlola izilimo zakhe. Kubikwa umamanagala wathi uyasondela eduze lothango lwensimu yakhe wathola umsolwa ezitika ngezimfe zakhe engagqize qhakala ukuba umamangala engathutsha.
Kubikwa umsolwa wathi ebona umamangala waqukula inyanda yakhe yezimfe wacela ezinyaweni. Ngemva kwemizuzu engatsho lutho umamangala kubikwa wathi esebuyela emzini wakhe wathola umsolwa esethengisa izimfe lezi kwezinye izitolo.
Umamangala wabika udaba emapholiseni okuyinto eyabangela ukuba umsolwa abotshwe.
Ebuzwa ngumantshi uMnumzana Stephen Ndlovu umsolwa ulivumile icala lakhe lokutshontsha izimfe lezi wathi wazidla ngoba engafuni zidliwe zinyamazana zendle kodwa ubefuna zivuthelwe emlonyeni.
Umsolwa utholakale elecala lokutshontsha izilimo ngakho umantshi umgwebe ukwenza iCommunity Service enkambeni yamapholisa.
Online Reporter