admin
YiNtatheli kaMthunywa
LONYAKA abafana lamankazana adlala inguqu kuzikolo ze-Primary koBulawayo lakuzabelo zeMatabeleland bazatshibilika umnyaka uze uyephela kulandela ukuphenduka kwenkezo ye-Ingwebu Breweries.
NgoLwesihlanu isabelo seMatabeleland South sizaqhuba imidlalo yenkezo le kudingwa izikolo ezizadibana kuma-final.
Umaqhuzu weNgwebu uNkosana Prince Ndlovu ubikele iphephandaba likazulu ngoLwesibili ukuba inkampani kamagwebu yelule izandla ngokuqhubekela phambili isekela inguqu yabasakhulayo.
“Inkampani ye-Ingwebu Breweries ithanda ukwazisa uzulu kanye lezikolo ukuba umncintiswano wayo we-Inter-Primary Schools Tournament usuphendukile. Inhlanganiso yabaphathi bezikolo National Association of Primary Heads iNaph, yiyo eqhuba umncintiswano lo. Silokuthaba ukuthi amankazana azaphinda ancintisane. Leli linyathelo elihle elenza umntwana oyinkazana olethalenta azibonakalise emphakathini. Ingwebu yinkamapani ezahlala isekela ithalenta lamankazana njalonje,” nguSibanda lo.
USibanda uthe inkampani yabo ithembisa ukuthi umncintiswano uzakuba khona minyaka yonke ngoba kuyinhloso yabo ukuthuthukisa ezemidlalo kwabatsha ikakhulu abantwana abasezikolo zePrimary.
Inkezo le yasungulwa ngo1994. Izikolo ezizancintisa kusasa zibalisela iMkhaliphe, iTogwe, iNkwalini, iMthwakazi, iButshe, iSanzukwi, iMangwe lezinye. Isikolo esizanqoba kuhlandla lokuyamela isabelo saso sizanikezwa $1 200 kuthi amankazana aphiwe $1 000. Ithimu ekunombolo yesibili izahamba ekhaya iphethe i$1 000, amankazana athole i$800. Leso esizaqeda sikunombolo yesithathu ebafaneni sithola i$800, eyamankazana ithole i$600.
Abaqoqi balumqhugelwano bathe ku-final, isikolo esizanqoba zonke sizaphiwa i$2 500.
Online Reporter