admin
Nkosilathi Sibanda
“IDYNAMOS ayisoze iphume ichelesile kulimpelaviki enkundleni yeColliery ngoba iqembu lezimbamgodi, iHwange izayiqeda ubungqwele bayo.”
La ngamazwi kaNation Dube.
Amaqembu la adibana ngeSonto kumdlalo wokuqeda ihlandla lakuqala kulisizini yeCastle PSL.
UDube ubikele iphephandaba likazulu ukuthi loba ithimu yakhe ikhanya isadalala, ulethemba lokuthi bazayivalela iDynamos njengeminyaka yonke.
Umqeqetshi lo usehlonitshwe kabanzi kunguqu ngokuba ngomunye walabo asebethwalise iDynamos amagabha avuzayo enkundleni yeColliery.
Kumbali yenguqu, inkundla yeColliery yaziwa ngokuthi ayikho lula ukudlalela kuyo njalo amathimu abalisa iHighlanders leDynamos avame ukungaphumeleli kuyo.
Uthe ubona angathi iChipangano ilakho ukuletha ukudana okukhulu kulesigaba seligi yeCastle PSL. Uthe ukuqina kwabo kuzabonakala “ngokungcwaba” ithimu le eyesatshwa ngabanengi.
“Abantu bazazibonela ukuthi iHwange ayithandabuzi nxa ithe yadlala leDynamos enkundleni yeColliery.
Sengilungiselele ukuthi sidlale ngcono kulumdlalo loba nje sivela nqotshwa yiHow Mine.
“Ithimu iyahlangana. Abadlali bayazwisisana njalo siyajabula ukuba akulamdlali wethu olimeleyo.”
UDube uthe uzitshaya isifuba enkambeni yakhe, esazi ukuba kulumdlalo iDynamos yiyo etshaywa luvalo.
Uqhubeke wathi: “Ayisikho ukuthi siyethusela kodwa sithi akulanto esiyesabayo. Ithimu yonke ekuligi le izimisele, nxa singanqotshwa kutsho ukuba asisebenzanga kuhle.”
Imvimbi yalithimu uDavid Boriwondo ukhulume engesabi ukuthi iqula lakhe lizavala emuva ukuze abagadli beDeMbare bangalitheli lula emambuleni.
“Njengamathimu amakhulu la awakhohlwe ukuthi azadlula eqenjini lethu nxa siseColliery. Ngeke ngiwatsho ngamabizo amaqembu la, kodwa ayazazi. Inhloso yethu njengokutsho komqeqetshi yikuthi sidlalela ukungakhitshwa kuligi. Okuqakathekileyo yikunganqotshwa nxa sidlala koBulawayo,” kutsho uBoriwondo.
Iqembu leHwange yilo lodwa elingazange lizihluphe ngokuthenga abadlali abatsha kulisizini.
UDube uthe uselethemba lokuthi ulwazi alalo ngeDynamos luzabaphathisa ukuthi bayinqobe kumidlalo yonke kulisizini.
“Ukuthapha ulwazi lezixwayiso zabanye bami ebhentshini lethu labaqeqetshi kuzasisa khatshana sibili. Kumele sidlale sihlosile ngeSonto.”
Umqeqetshi lo uveze ukuthi usezadanisa inhliziyo zabalandeli bamathimu wonke azavakatshela eHwange.
Online Reporter