admin
Thokozile Mbedzi loNkosilathi Sibanda
KULESALUKAZI seBinga esibulewe ngabaphurofethi kabuhlungu ngoba sicatshangelwe ukuthi siyaloya.
Kube lusuku olubi kusenzakala lokhu phambili kwezakhamizi zesiqintini seDonga, abaphorofethi abathathu behlasela ugogo lo, uZenkela Muleya obeleminyaka engu-72 yokuzalwa.
Udletshana olufinyelele iphephandaba likazulu luveza ukuba izigilamkhuba lezi zafika esiqintini seDonga ziphezulu kohambo lokuqeda ubuthakathi. Kubikwa zabuthanisa abantu andubana zikhombele ugogo Muleya.
Abafakazi abazibonele mathupha isihlakalo lesi bathe badonsa isalukazi basitshela ukuthi bazasikhipha ubuthakathi mhlalokho.
Kubikwa basigela inwele, basisika sika umzimba ngaphambi kokuthi basigcobe umuthi othile ongaziwayo emanxebeni aso, qede lapho basibamba ngamandla ukuthi siwunathe.
Intatheli zikhulume lesinye isakhamuzi sakulindawo uNkosazana Elina Mudimba othe babone into yamehlo.
“Ugogo uMaMuleya ubengugogo nje esigabeni. Ezihlalele kuhle labanye. Abaphurofethi laba babuya bathi bayasiza umphakathi, ngakho bazaveza abantu obathakathayo esigabeni,” kubika uNkszn Mudimba.
“Abaphurofethi laba babiza ugogo uMuleya, babika ukuba bafuna ukumlahlisa ubuthakathi. Ngesihluku esikhulu, baqala ngokumphuca inwele nge-razor, bamgcoba umuthi kodwa asikwazi ukuba bekungumuthi bani. Bathe beqeda lokhu bambamba ngamandla ukuba anathe umuthi lo. Ugogo wawunatha umuthi qede wahle wafela khonapho.
“Silokudana okukhulu ngokwenzakeleyo esigabeni sethu lapha. Amazwi abadala athi umuntu omdala ungumthunzi esigabeni kodwa okwenzakeleyo kulihlazo akuwavezi amazwi lawa.”
Kusenjalo, amapholisa asebike ukuba adinga ulwazi olungasiza ekubotshweni kwamadoda amathathu la.
Isikhulumi samapholisa uAssistant Commissioner Paul Nyathi ekhuluma lentatheli yephephandaba likazulu uthe bacela uzulu ancedise ekubotshweni kwababulali.
“Kulamadoda amathathu azithi ngabaphurofethi acatshileyo ngemva kokuba egele aphinda anathisa elinye inina umuthi lafa.
“Ngakho amapholisa acela uzulu ukuba aphathise ngokwazisa amapholisa aseduzane ukuze amadoda la afinyelelwe yisandla somthetho,” kutsho uAsst Comm Nyathi.
Uthe kuzwakale ukuthi omunye wabaphurofethi laba udume ngebizo elithi “Kiss”.
Izakhamizi zibikele uMthunywa ukuba ngemva kokubulala ugogo, abaphurofethi bahle badla bayi bayi.
Online Reporter