Online Reporter
YiNtatheli kaMthunywa
KULAMADODA amathathu agwetshelwe ukuyapika iminyaka engu-72 kulandela ukutholakala elamacala amathathu okugqekeza ehlomile.
Abathathu laba bagwetshelwe ukuyapika iminyaka engu-12 kucala linye ngalinye kukanti umantshi uNkosikazi Sibongile Marondedze esethula isigwebo uthe abathathu laba kumele bayehlala isikhathi eside ejele ngoba bayingozi kumphakathi.
Ubuye wathi kucala lesibili lelesithathu izigwebo zakhona zizaqhutshwa sikhathi sinye okutsho ukuba munye ngamunye wabo uzapika iminyaka engu-24 ejele.
Kubikwa abasolwa laba babedala amacala la bebahlanu, kodwa ababili babo bedlula emhlabeni ngemva kokudutshulwa ngesikhathi bebotshwa.
Abathathu abagwetshiweyo nguFortune Nyathi (40), Bigboy Winston (32) loAleck Ndlovu (27), njalo bonke bahlala eCowdray Park, koBulawayo.
Ababili abedlulayo nguSipho Ncube loDumisani Ndlovu.
Kuvele ukuthi laba babedala amacala la behlomile ngembhobho kunye lengqamu yohlobo lwe-Okapi.
Abathathu laba balandule amacala abo babuye bacatsha ngomunwe bethi kabazani, bazane esitokisini sebebikelwa ukuthi badala amacala la ndawonye.
UNkkz Marondedze esethula isigwebo uthe loba bezama ukulandula amacala abo kodwa kusegcekeni ukuthi bazama ukucatsha ngomunwe. Ubuye waveza ukuthi abafakazi bebengeke babakhombele phakathi kwabantu bonke abahlala koBulawayo bathi yibo ababahlaselayo.
Umtshutshisi kulelicala uMnumzana Milton Moyo uthe amacala la adalwa ngenyanga kaMabasa ngomnyaka ka2024.
Inkundla izwe ukuthi mhlaka 12 Mabasa ngomnyaka ka2024 ngehola lesificaminwe mibili ebusuku abathathu bafika koRespect Nkomo lapho ale-tuckshop khona. Abetheswacala batshaya insimbi ye-tuckshop okwenza uNkomo waphuma ukuze abasize wafica kulomuntu oyedwa kodwa wezwa abanye sebesemnyango. UNkomo evula isivalo wabona abasolwa ababili omunye wakhona wahle wamkhombela ngombhobho ekhanda wamfuqela endlini wasemlaya ukuthi avale ifasitela le-tuckshop yakhe.
UNkomo walaywa ukuthi alale phansi omunye wabasolwa waqonda emkulwini lapho abafica unkosikazi kaNkomo bamlaya ukuthi abaphe imali.
Abetheswacala bathatha iUS$70, R1 000, umakhalekhukhwini wohlobo lwe-Redmi 9A le-satchel emnyama eyayilamakha phakathi badliwa ngumnyama.
Kucala lesibili, bafika egalajini leSuta Suta Filling Station eKelvin, koBulawayo ngo7 ntambama lapho uNyathi afika ephethe isigubhu se 5-litres ezenza angathi ufuna ukuthenga amafutha emota.
Kubikwa uBrighton Ndlovu wamtshela ukuthi akulaphethulo kodwa kule-dizili. UNyathi waqhubela uNdlovu i-R100 kunye lesigubhu ukuthi athele idizili.
UNdlovu esethele idizili ye US$3 uNyathi wamlaya ukuthi ame ukuthela andubana ambikele ukuthi bazotshontsha.
UNyathi wadubula emoyeni waselaya uNdlovu kunye labanye abasebenza laye ukuthi balale phansi. UWinston owayephethe ingqamu wathutsha loAleck Ndlovu ababeme egedini. Kubikwa bazama ukwenqabela unogada ukuthi abaleke kodwa wedlula kodwa uNdlovu bamtshaya ngombhobho wawela phansi waqaleka.
Abetheswacala balaya ukuthi baphiwe imali bathatha iUS$593.
Kucala lesithathu bakhuthuza izisebenzi zegalajini elifanayo ezazilele phansi.
Bathatha umakhalekhukhwini kaTsitsi Dzambara babaleka.
Kubikwa owayechwayisisa ngodaba lolu wenelisa ukubopha umsolwa wesibili owayesenike intombi yakhe umakhalekhukhwini lo ukuze amthengise, ngemva kokuba behlole ukuba ungaphi bencediswa yinkampani ye-Econet.
Esebotshiwe uWinston wabuye wachaza abanye bakhe abane. Ekubotshweni kukaDumisani Ndlovu loSipho Ncube, kwaba lokudubulana, okwabangela ukuthi ababili laba badutshulwe, ababili laba bafela esibhedlela.
