Mthabisi Tshuma
KULOMONGIKAZI wePlumtree osolwa ngokuqila izakhamizi ezifisa ukuthi abantwabazo bafundele ubongikazi ngokuzidizisa imali ethi yiyo indlela engenza benelise ukuthi bathole indawo yokufundela umsebenzi lo.
Umongikazi lo, -Eustina Tshuma, kubikwa kazange aqile abafisa ukuba ngomongikazi kuphela, kodwa wabuye waqila ngitsho lasebenza labo ethi ugulelwa ngabazali.
Abanye abakhala ngaye bathi balahlekelwe zinkulungwane zamadola eMelika, njalo abanye baze bathengisa imbuzi lenkomo ukuze bathole imali yokufundisa abantwababo.
Omunye owaqilwayo, uthe uTshuma wathi ulobudlelwano loMphathintambo wogatsha olubona ngezempilakahle lokunakekelwa kwabantwana kuHulumende njalo wayengabancedisa ukuthola indawo zokufundela ukuba ngomongikazi, ikakhulu eBrunapeg Mission eMangwe.
Abanye abathi baqilwa bathe wayesiba lolaka nxa sebemcela ukuthi ababhadale imali yabo.
NgoMvulo odluleyo, abanye babantu laba babumba iqembu kuWhatsApp elibizwa ngokuthi
“Scammed by Eustina” ukuze bahlanganise izikhalazo zabo njalo baxoxe ngokuyabika udaba emapholiseni.
UTshuma wayethengisa amagetsi njalo ebhadalela abantu imali zesikolo besebenzisa imali yakuleli, iZimbabwe Gold (ZiG), abesebabisela ngamadola eMelika ngesilinganiso sokuntshintshia ese-30.
Umfakazi lo owayelethe unina esibhedlela, uthe wacina eboleke uTshuma i-US$300 ngemva kokuthenjiswa ukuthi uzambhadala lenzuzo. Ngemva kokubhadalwa kwemali yokuqala, uTshuma wamcela ukuthi amthumele i-ZiG15 000.
“Ubelokhe engibalekela esithi uzangibhadala, kodwa akukho okwenzakalayo. Ungikweleda iUS$820,” kutsho umfakazi lo.
Ukhansila kaWard 1 ePlumtree, uGodfrey Ngwenya, uthe abanye babantu abakhonona ngoTshuma bamfake eqenjini labo leWhatsApp bamcela ukuthi adlulisele izikhalazo zabo ebazalini bakhe.
Uthe wahlangana labazali bakaTshuma, abaveza ukudana ngensolo lezi kodwa bachaza ukuthi labo babhekane lobunzima, okugoqela ukugula kukayise.
Imizamo yokuxhumana loTshuma yehlule, njengoba engazange aphendule imilayezo ayithunyelweyo kunye locingo.
