Online Reporter
Ethel Ncube
IMPILO yabatsha esigabeni seGwanda kuWard 12 isizaguquka ibe ngcono nanko sebenikwe isipho senhlanzi ezihlanyelwe edamu leGungwe.
Uhlelo lokunikwa kwabatsha inhlanzi luza luvela ngaphansi kohlelo lukaHulumende lwePresidential Fisheries Scheme.
Abatsha laba banikwe inhlanyelo yenhlanzi ezingu-4 000.
Omunye wabatsha uSazini Moyo ubike ukuba abatsha bazathuthuka.
“Siyathaba ngephurojekithi le esiyamukele ivela kuHulumende. Yibhizimusi elakho ukuphilisa abatsha abanengi bendaweni yakithi.
“Banengi abazakwenelisa ukusungula amabhizimusi abo. Lokhu kuzehlisa inani labatsha abacina bephatheka ezintweni ezingalunganga ezifana lokuthatha izidakamizwa. Iphurojekithi yenhlanzi le izathuthukisa izinga lempilo yethu ibuye iphucule impilo zabatsha,” kubika uSazini.
Omunye wabatsha uJosphat Sibanda ubike ukuba uhlelo lolu luzabaphakamisa.
“Njengentsha uhlelo lwenhlanzi lolu siyaluthabela njalo siyathembisa ukuba sizazigcina kuhle silondoloze ledamu lethu. Uhlelo lolu luzasiphakamisa ukuthi sibe lamabhizimusi sithengise inhlanzi lapha lakwezinye izigaba,” kubika uSibanda.
Okhulume emele induna uMathe, uMnumzana Kayiso Nyathi uthe abatsha bazaphathiseka kakhulu ngohlelo lolu.
“Siyaluthakazelela uhlelo lukaMongameli lolu njalo luzathuthukisa abatsha ezigabeni zethu. Abatsha kumele balugcine kuhle uhlelo lolu lube yimpumelelo,” kubika uMnu Nyathi.
