Online Reporter
IMPILO yabantu iqakathekile kakhulu. Yikho ukuqakatheka kwempilo yabantu okwenza ukuthi nxa ekhona ogulayo emulini sitatazele, sibamba lapha lalaphaya sizama ukuthi siphuthume ahanjiswe esibhedlela.
Yikho njalo okwenza ukuthi nxa kulomdlalo wenguqu, imota ethwala izigulane ngesiphangiphangi, i-ambulensi ibekhona imelele ingozi engenzakala.
Lokhu akutsho ukuthi izenzakala ingozi kodwa kwenzelwa ukuthi ingenzakala, abantu bazi ukugijimisela lowo oselimele esibhedlela ukuze kunakekelwe impilo yakhe. Ngesizatho sokuthi impilo yomuntu iqakathekile.
Asima-ambulensi wodwa adingakalayo ukuze impilo yomuntu igcinwe kuhle. Emadolobheni abantu basebenzisa amagasi, amafutha ezimota, amagetsi, ipharafini lokunye okungenza kube lemililo emikhulu.
Imililo le nxa isithe yabakhona kumele kube lezimota ezicitsha lumlilo ukuze abantu bangatsheli ezindlini lempahla yabo.
Emadolobheni kungumlandu wamakhansili ukubona ukuthi lezizimota zikhona njalo zilawo amanzi okucitsha umlilo ngoba akusimpilo yomuntu kuphela engatshabalala nxa kuthe kwaba lelangabi lomlilo, kodwa lamabhizimusi ayatshabalala.
Ibhizimusi yimpilo yomuntu. Ukutshabalala kwayo emlilweni yikutshabalala kwempilo yomuntu ngoba mhlawumbe kuyiyo ayithembileyo.
Ngakho-ke amakhansili ahlakaniphileyo njalo alendaba lempilo zabantu ayabona ukuthi ama-ambulensi lezimota ezicitsha umlilo zikhona kuzo zonke indawo ngoba ziqakathekile empilweni yabantu.
Kuyajabulisa ukuthi iKhansili yakoBulawayo isinanzelele ukuthi iCowdray Park lilokitshi elikhulu koBulawayo, ngokunjalo sokuyenze yabona kufanele ukuthi kube leFire Station kule indawo.
Inhloso yokufaka i-fire station kule indawo yikwehlisa isikhathi esithathwa yimota lezi zisiya kuzimo eziphuthumayo elokitshini leli lakwezinye indawo eziseduzane ngoba kukhangelelwe ukuthi zifike kungakedluli imizuzu engu-10 betshayelwe ucingo.
Lokhu kutsho ukuthi abantu bakule indawo kunye labamabhizimusi kulindawo abaseyikudlela evalweni ukuthi nxa kungenzakala kube lengozi yomlilo bangahlekelwa yikho konke basale bekhala ezimathonsi ngoba izimota zosizo oluphuthumayo seziseduzane.
Siyitshayela ihlombe ikhansili yethu ngokunanzelela lokhu lokuthatha izinqumo eveza ukuba ilothando labantu abaphila kulelidolobho lakoBulawayo.
Kuyajabulisa njalo ukuthi uHulumende laye uyakunanzelela lokhu yikho esenike ikhansili le ilungelo lokufundisa izicitsha mlilo (fire fighters) ezisezansi yelizwe okutsho ukuthi abafisa ukufundela umsebenzi lo abangaphansi kwamakhansili emaphandleni abalisa iMatobo, Hwange, Tsholotsho, Kusile, Insiza, Bulilima lamanye sebezafundiswa koBulawayo.
Siyakholwa ukuthi ikhansili izabona ukuthi endaweni le kakusoze kube yimiduli kuphela kodwa abantu bazathola uncedo olupheleleyo.
Lokhu kuzenza abantu bathi nxa betshayela izimota lezi ucingo babe lethemba lokuthi ngempela bazaluthola usizo ngokuphuthuma hatshi ngebizo lokuthi indawo le isiseduzane labo.
