Online Reporter
Fungai Muderere
UMNIKAZI weqembu leScottland, uPedzisayi “Scott” Sakupwanya yindoda engesabi ukukhuluma okwayo njalo kukhanya ulesibindi esiqinileyo.
Andubana iqembu lakhe lidlale leHighlanders, uhle wabika ukuthi bazayibhaxabula 4-0. Akula ngitsho lomqeqetshi kuPremier Soccer League owake wabika okunje esiyadibana lekaMatshobana eMagumeni.
USakupwanya utshengise ukuthi uyabathemba abadlali bakhe, kodwa bengakwenelisa lokhu phambili kwabalandeli beHighlanders abazabe beyinhlabathi eBarbourfields ngeSonto?
Lo ngumbuzo ozaphendulwa yilabo abazabukela umdlalo lo okhwezwe imali yokungena enkundleni, isuka ku-US$3 isiya ku-US$5. Inhlanganiso yePSL ivumele isicelo seHighlanders sokuthi ikhuphule imali yokungena.
Uhambo lokuya eBarbourfields ngolwakuqala kuScottland, yona esidlale kathathu isekhaya layo enkundleni yeRufaro, eHarare. Kusukela ngeviki edluleyo, iqembu leli libike kunkundla zayo zokuxhumana ukuthi lilande ukuzo “kwenza umsebenzi omkhulu” koBulawayo.
Umsebenzi lo ngowokuthi linqobe iBosso ngokuyibhaxabula., njengokutsho kukaSakupwanya.
“Ngifuna ukutshela iHighlanders ukuthi siyeza. Sizalitshaya 4-0,” nguSakupwanya lo.
Kumidlalo yalo edluleyo, iScottland idlale leTriangle United, Ngezi Platinum Stars leCAPS United. Inqotshwe 1-0 yiNgezi Platinum ngeviki edluleyo.
Kuqula leHighlanders, imisila iphezulu ngokuzethemba kubadlali. Iqembu belilolonga liseBeitbridge kumalanga adluleyo, lapho elidlale khona kowobungane leqembu leBishopstone, abalinqobe 8-0.
Abadlali abathathu beBosso bahlohla amabhola amabili ngamunye ngamunye, uNigel Banda, Tendai Muvuti loNqobile Ndlovu. Amanye amabhola avela kuNever Rauzhi logician Nyathi.
Lidlale njalo leDulibadzimu FC, lanqoba 2-1, kuhlohle uBrighton “Maninja” Ncube.
Ukaputeni weqembu, u-Ariel Sibanda uthe ukuyalolonga eBeitbridge kubelithuba lokuthi balungise amaphutha abawenza kumidlalo emithathu edluleyo. IBosso isithole imiklomelo emine njalo unozinti wayo uRaphael Pitisi wenza amaphutha engenisa amabhola alula, bedlala leMWOS leGreenFuel, okwahlasela kakhulu imizamo yokubuthelela imiklomelo kumidlalo yokuvula isizini.
USibanda uthe amaphutha abo sebewafake eceleni, sebekhangele phambili.
“Siyilindele iScottland. Amadlabuzane aphezulu kubadlali,” kutsho lumdlali, osanda kwengeza isivumelwano sakhe leqembu ngeminyaka emibili.
Kweminye imidlalo ngeviki lesine kuCastle Lager Premiership, iChicken Inn izadlala leZPC Kariba eNyamhunga ngoMgqibelo. IFC Platinum idibana leMWOS eMandava. Abafana besikolo, iHerentals baleManica Diamonds eRufaro. Inkundla ye-Ascot Stadium izaphatha umdlalo weTelOne leCAPS United. IBikita Minerals izagqikilana leGreenfuel eSakubva Stadium eMutare. IDynamos ihlangana leSimba Bhora isekhaya.
Imidlalo ngeviki lesine:
NgoMgqibelo:
TelOne v CAPS United (Ascot), Ngezi Platinum Stars vTriangle (Baobab), Bikita Minerals v Greenfuel (Sakubva Stadium), Yadah Stars v Kwekwe United (Heart Stadium), FC Platinum v MWOS (Mandava), ZPC Kariba v Chicken Inn (Nyamhunga Stadium), Herentals v Manica Diamonds (Rufaro Stadium)
NgeSonto:
Highlanders v Scottland (Barbourfields), Dynamos v Simba Bhora (Rufaro)
