Online Reporter
Yintatheli kaMthunywa
KULENDODA lomkayo abakhiyela indodana yabo eleminyaka engu-16 endlini okweminyaka emibili.
UHerbert Purumero (45) lomkakhe uMemory Kamuchato (40), bebencitsha indodana yabo uTinotenda Purumero (16) ukudla okokuthi umfana ubecina esidla yiloba yini ayitholayo ekamelweni kugoqela lengcekeza yakhe.
Lokhu kwabangela ukuthi acine ehlaselwa ngumkhuhlane wokungadli kuhle (malnutrition).
Kubikwa bakhiyela uTinotenda endlini yabo eseSt Mary’s eChitungwiza.
Kuminyaka emithathu edluleyo iphephandaba leH-Metro lakhipha udaba lomunye ugogo okuthiwa nguPlaxedes Mashasha owayevalele indodana yakhe uGrant kuphahla lwendlu yakhe okweminyaka engu-14.
Khathesi, uHebert lomkakhe uMemory labo sebenze okufanayo.
UHebert wehlukana lenina elizala uTinotenda kudala.
Ngenxa yokuvalelwa, uTinotenda wacina ehlaselwa yi-malnutrition njalo ubelamanxeba atshengisela ukuba ubehlala etshaywa.
Abasolwa babotshiwe njalo bamiswe phambi kukamantshi uDennis Mangosi obanikeze isigwebo sokuthi bayehlala ejele okweminyaka emibili.
Inyanga ezine zesuliwe okutsho ukuba bazapika inyanga ezingu-20 ngecala lokuphatha uTinotenda kubi.
Umfana lo ulalisiwe esibhedlela njalo angaphuma kukhangalelwe ukuthi ayegcinwa kwenye indawo ephephileyo.
Umtshutshisi wecala leli uShamiso Charmaine Mwapangira ubikele umthethwandaba ukuba kusukela ngoNkwenkwezi 2022, abasolwa bakhiyela umfana lo ekamelweni elingcolileyo bamalisa ukuphuma kulelikamelo.
Abazange bamdingele usizo lwezempilakahle yiloba kwakumgceke ukuthi kaphilanga kuhle.
Esikhathini esinengi, kutsho umtshutshisi, umamangala wayetshiywa lodadewabo oleminyaka engu-23 uPaidamoyo Purumero, ongaphilanga kahle engqondweni.
Uchuku lwabo lwaba lomthelela omubi emqondweni lakumpilakahle kamamangala.
Abasolwa betheswa icala lokungaphathi kuhle umntwana ngokubekwe kusiqendu 7 (1) seChildrens Act Chapter 06.
Intatheli zike zathola ithuba lokuyafika emzini wabasolwa, kodwa zafica kungelamuntu endlini.
Kubikwa udadewabo kaTinotenda wathathwa ngesinye isihlobo esihlala eEpworth.
