Online Reporter
BEKUYISIPHITHIPHITHI koBulawayo ngoMvulo ekuseni abazali labantwana besiya endaweni ezehlukeneyo lapho okuthwalelwa khona abafundi besiya ezikolo okufundwa kuhlalwa khona ezisesabelweni zeMatabeleland North leSouth.
Izikolo zivulwa ngoLwesibili.
Inhlolisiso yephephandaba endaweni yokupaka izimota eCity Hall iveze abafundi abanengi akade bekhanya bejabula kukanti abanye bebekhala begada emabhasini abo esikolo.
Bekulusuku lokugijima, izimuli zigijima zisiya le lale zithenga impahla zabantwana zesikolo ezisilelayo.
UThubelihle Moyo, indodakazi yakhe efunda uFomu 3, e-boarding school esabelweni seMatabeleland North, uthe ugxile ezintweni ezibalulekileyo kulokuthenga amayunifomu amatsha.
“Amayunifomu endodakazi yami asesimeni esihle, obekumele ngikuthenge yikudla, amabhuku kunye lokokubhalisa. Ngimfisela okuhle kumihloliso yakhe yokuphela komnyaka, ngenze isiqiniseko sokuba uyathola konke akudingayo ukuze angaphambaniseki ezifundweni zakhe,” kutsho uNkszn Moyo.
Ithemu yesithathu yesikolo ngokujwayelekileyo yisigaba esibaluleke kakhulu, njengoba kubhalwa imihloliso yamabanga athi Grade 7, Ordinary Level kunye le- Advanced Level kumaviki ambalwa azayo.
Kubazali abanengi, ukugijima kwangoMvulo bekusitsho ukulungiselela izingane zabo impumelelo kuthemu yokucina ebaluleke kakhulu.
