admin
ABEHLI ubuthongo kunina wentombazane yeNgwavuma, osekuphele izinyanga yanyamalala.
UNkosazana Lethiwe Mngomezulu, waphuma ekhaya ngoMbimbitho mhlaka 11, esiyahlangana lesoka lakhe eRichards Bay, elalizomsiza abhalise egatsheni le-Unisa elikuleli dolobha kodwa kwaba lusuku lokugcina umdeni owambona ephila.
Unina wakhe uNkszn Sindi Ntshangase, uthi selokhu yanyamalala ingane yakhe ubuthongo abehli ngoba kuze kuse ecabanga ngayo. Uthi indodakazi yaphuma iya eRichards Bay, iyohlangana lesoka uMnumzana Bheki Thokozani Thethwayo waseMtubatuba, ayehlele ukuba amsize abhalise e-Unisa. Uthi kwakungoLwesine ngesikhathi indodakazi iphuma ekhaya kodwa akazihluphanga uma ingabuyi ngoba yayithe izobuyela kudadewabo eMtubatuba.
UNkszn Ntshangase uthi ngeSonto wathola ucingo luvela esokeni lendodakazi libuza ukuthi ihambe kanjani ngoba abahlangananga layo ngoLwesine. Uthi isoka lathi lona liseMgungundlovu.
“Ngathuka ngoma ngizwa lokhu ngabe sengifonela udadewethu eMtubatuba, lakho kwathiwa akafikanga. Sibe sesiyobikela amapholisa aseRichards Bay kwavulwa icala,” kutsho uNkszn Ntshangase.
Uqhubeke wathi amapholisa abophe isoka ngoba athole ukuthi ngalo usuku aphuma ngalo ekhaya, uphenyo lwamaselula lukhomba ukuthi babendawonye. Okhulumela amapholisa KwaZulu-Natal uCaptain Nqobile Gwala, uthe amapholisa aseRichards Bay, aphenya icala lokuthumba futhi asebophe umsolwa oleminyaka engu-35 owavela enkantolo zingu-31 Mbimbitho, waphinda wavela ngeSonto edluleyo ezofaka isicelo sebheyili.
Online Reporter