Online Reporter
YiNtatheli kaMthunywa
KUSIGA esisemlonyeni yabanengi esigabeni seGuruve, kulamalunga emuli inye, amahlanu asolwa ngokubulala isihlobo sawo, kumbango wesikhundla sokuba yinduna.
Isikhulumi samapholisa elizweni uCommissioner Paul Nyathi, ngoLwesihlanu uthe abasolwa kubikwa babulala uJohn Chimana Chaora, obeleminyaka engu-54 yokuzalwa.
UCommissioner Nyathi uthe uphenyo lwamapholisa luveze ukuba isehlakalo lesi sabangelwa ngumbango wesihlalo senduna ebesizaphathwa ngumufi.
Uthe abasolwa nguKelvin Katuruza Chaora (26), umfana oleminyaka engu-16, Chemika Gwenzi (33), Birumbe Mandeya (35) loRanwes Chaora (58).
Kubikwa babotshwa ngemva kokuba amapholisa ethole udletshana lokunyamalala kukamufi mhlaka 28 Mpalakazi 2025.
“Umfana omncane lo waveza ukuthi wayelo Kelvin Katuruza Chaora, Allicious Bvumbe, Chemika Gwenzi loBirumbe Mandeya, kwatholakala njalo umakhalekhukhwini lezicathulo zikamufi,” kutsho uCommissioner Nyathi.
Uthe mhlaka 31 Mpalakazi 2025, abasolwa batshengisa amapholisa lapho okulomzimba kamufi, owawusu wonakele, duzane ledamu le-Ambush, eKazunga Village, eGuruve.
UCommissioner Nyathi uthe uKelvin Chaora watshela amapholisa ukuthi uRanwes Chaora nguye owabopha iqhinga lokubulala.
