admin
Kingstone Mapupu
MATIKITIVA eCriminal Investigation Department (CID) anoti akasunga mumwe murume wekwaMambo Sitaudze, kuBeitbridge, mushure mekuwanikwa aine haka pamba pake.
Langutani Sibanda (37) akasungwa pasi pemutemo weParks and Wildlife Act Chapter 20:14 Section 45 (1) (b) uyo unoona nezvekuchengetedzwa kwemhuka dzesango.
Mutevedzeri wemutauriri wemapurisa eCID, Detective Assistant Inspector Rachael Muteweri, vanoti Sibanda akawanikwa aine haka mhenyu pamba pake nemusi wa9 Chikunguru gore rino.
Matikitivha anonzi akawana runyerekupe rwekuti murume uyu aive nehaka kumba kwake apo vakazoenda kwaanogara vachibva vanomusunga.
Mune imwewo nyaya inodyidzana neino, matikitivha echikamu cheMFFU kuGuruve vakasunga Fortunate Jombo (33) wepapurazi reBrandon, kuMvurwi, nekuda kwemhosva yekuwanikwa aine nyama yembizi yairema 20kg.
Jombo anonzi akawanikwa zvakare aine matehwe maviri emhuka diki mbiri dzinoti nzunza nechidembo izvo ainge akaisa musaga akazvichengeta muimba yake yekurara.
Det Asst Insp Muteweri vanoti musungwa uyu achapinda mudare redzimhosva.
Kudunhu reUmguza, kune murume anonzi Square Mpofu (48) wepapurazi reBlueborn uyo anonzi akawanikwawo aine dehwe reshato inova mhuka inochengetedzwa pasi pemutemo wenyika.
“Nemusi wa13 Chikunguru 2019, murume uyu anonzi aiva kumba kwake aine dehwe reshato apo matikitivha akawana runyerekupe rwekuti aiva nedehwe rakaomeswa rakaiswa pasi pemubhedha muimba yake yekurara. Dehwe reshato iri rakareba mamita 1,6.
“Murume uyu akabva asungwa uye ari kubatsirana nemapurisa mukuferefetwa kwenyaya iyi achimirira kupinda kumatare edzimhosva,” vanodaro Det Asst Insp Muteweri.
Vanoyambira veruzhinji kuti kuuraya mhuka ipi zvayo yemusango pasina mvumo yebazi rinoona nezvekuchengetetwa kwemhuka imhosva huru.
“Tinoyambira veruzhinji kuti vasiyane nekuuraya mhuka zviri kunze kwemutemo. Hatizombofa takapeta maoko tichiona vanhu vachipara mhosva, tinovabata vopihwa zvirango zvavo nematare edzimhosva.
Online Reporter