admin
Msilisi Dube
INHLANGANISO yeJoshua Nkomo Foundation okuyinhlanganiso ekhangele ngokugcinwa kwembali kamuyi, uDokotela Joshua Mqabuko Nkomo ikhalaza ngokubekwa kwelanga lokukhumbula lokuzalwa lokukhothama kweqhawe leli ukuze imbali yalo ingatshabalali.
Isikhalazo lesi siza ngemva kokunanzelela ukuba imbali yeqhawe leli kayigcinwa ngendlela efaneleyo ngoba inengi labantu lingazi lokuthi iqhawe leli lakhothama nini.
Lokhu kuvezwe nguMnumzana Jabulani Hadebe oyisisebenzi senhlanganiso le.
“Unganazelela kwamanye amazwe anjengeBotswana kulamalanga abekwayo ngokusemthethweni awokuhlonitshwa kwamaqhawe, linye ngalinye likhunjulwa imisebenzi yalo.
“Lathi kumele senze okufanayo. Kumele kwazakale kukhalenda yethu ukuba ngelanga elithile kulusuku lokuzalwa kumbe elokutshona kwamaqhawe wonke jikelele. Abantwana ezikolo kumele bafundiswe kabanzi ngemisebenzi eyenziwa liqhawe leli ukuze labo balungisele imisebenzi emihle ayenzayo,” kulandisa uMnu Hadebe.
Umkhosi lo wokunanza usuku lokutshona kweqhawe leli uqhutshwa minyaka yonke mhlaka 1 Ntulikazi enkundleni yeStanley Square eMakokoba njalo lonyanga uzaqhutshwa ngaphansi kwendikimba ethi “Asikhulumisaneni.”
UMnu Hadebe uthe indikimba yalonyaka inikeza uzulu ingqobe yokuthi akhulumisane nxa kulolutho oluphambanisekileyo.
“Thina njengenhlanganiso sikhuthaza uzulu ukuthi sibambane ukuze sithuthukise ilizwe lethu. Umuyi wayedume kakhulu ngokubambana ngakho lathi kumele sihambe emanyathelweni zakhe.
“Ungananzelela abantu bavele behlukile emcabangweni kunye lenkulumeni ngakho kumele sikhulume okuzasakha sekele ukulwa. Ukulwa kuyabulala isizwe,” kulandisa uMnu Hadebe.
UKhomuredi Nomthandazo Eunice Moyo okhangele isabelo sakoBulawayo uthe umuyi wayeliqhawe eliqakathekisa intuthuko ebantwini abansundu ngakho kubalulekile ukuba uzulu ahambe emanyathelweni zakhe.
“Umdala wethu wayethanda ukuba abantu abansundu basebenze ukuze bazitholele ukudla. Wayengafuni muntu olivila ngakho kubalulekile ukuba sigcine imbali yakhe kuhle ngoba iqakatheke kakhulu.
“Imfundiso zakhe zaziqakatheke kakhulu ngoba ungazilandela kuhle uyaphila kuhle emhlabeni,” kuphetha uKhmrd Moyo.
Online Reporter