admin
Charity Moyo
ZISELE zinkemile izakhamizi zesiqinti seSwitsha, eGwanda lapho zisizwa ngenkemenkeme yendaba kamalukazana obanjwe xhaka ngumkakhe esemacansini loyisezala.
UMemory Moyo (28) uficwe ngumkakhe uDavid Dube (29) esemacansini lokhulu wengane zakhe uJephias Dube (52). Kuzwakale ukuthi ababili laba bebehlala bonke ekhaya nanko phela uDavid usebenza kwelinye ipulazi lomlungu eliseduze lalapho abahlala khona.
Umfakazi obikele uMthunywa ngalesisiga okhethe ukungaqanjwa ngegama uveze ukuthi umdlalo lo ubusulesikhathi eside udlalwa kukanti izihlahla kanye lenyoni zazikubona okwenzakalayo.
Uveze ukuthi uMemory wenda koDube ngemva kokumithiswa ngumkakhe uDavid.
Uthe uDavid kazange achithe isikhathi sabadala wamane wawamukela umthwalo kanti kabuzanga elangeni.
Kubikwa omakhelwane baqala ukusola ubudlelwano obuphakathi kukayise kaDavid lomkakhe uMemory ngesikhathi ukhulu lo esehlukana lelinye inina ayethandana lalo. Kuzwakale ukuthi ngemva kokwehlukana lesithandwa sakhe waqala ukusondelelana lomalukazana okokuthi ukhulu lo wayesetshona ekhaya exoxa lomalukazana wakhe baze batshayane izandla.
Kuzwakale njalo ukuthi ababili laba bake bakhandwa ngomunye umntwana ohlala esiqintini lesi bethandelene okwenyoka egangeni.
Kubikwa abantu bazama ukwazisa uDavid kodwa yena kazange akukholwe okwakukhulunywa ngabantu.
Kuvele ukuthi mhla wesehlakalo lesi UDavid wavalelisa njengensukwini okomuntu osesiya emsebenzini kodwa kazange ayekhatshana wacatsha eduzane lomuzi. Kuthe ngemva kwesikhathi wabacathamela wangena endlini wayithola insindabaphenduli.
Ekhuluma loMthunywa uDavid uveze ukuthi kalankani ngesenzo somkakhe loyise. Uqhubekele phambili esithi kakwazi ukuthi enzeni kodwa yena kasoze ephile lomfazi ohlubulela uyise impahla zakhe.
“Ngangihlala ngisizwa omakhelwane besithi balokusola ngobudlelwano obuphakathi kukababa lomkami kodwa angizange ngikukholwe.
“Ngazibonela ngawami amehlo mhlalokho, ngababamba xhaka ngaphela amandla amadolo ami atheneka okuzwayo.
“Angisoze ngihlale lomfazi onje, kumele ahambe. Ngeke ngikukhohlwe lokhu abangenza khona kodwa okusalayo lo kumele abuyele kibo mina lobaba ngeke sesula ubuhlobo kodwa ngithemba ngelinye ilanga ngizamxolela ngoba ngeke saxatshaniswa ngumuntu wokuza,” kutsho uDavid.
Ebuzwa yintatheli ecingweni ngalokhu uMemory uveze ukuthi kasoze akhulume lutho ngempilo yakhe. Uthe uMthunywa kahambe ayebuza lowo owamtshela lolodaba.
“Impilo yami kayingeni muntu, qhubeka uye kusomangase wakho lo owakutshela leyo ndaba. Mina hlukana lami,” kutsho uMemory ecitsha ucingo.
Online Reporter