admin
YiNtatheli kaMthunywa
INHLANGANISO yeZimbabwe Olympic Committee (ZOC) ibika ukuba akulalwa enkambeni zabadlali abalungiselela ukuyancintisa kumkhosi wamazwe owama-Olympics, nanko sekusele amaviki amabili ukuthi isizwe siyedibana lezintshantshu zomhlaba edolobheni leRio de Janero eBrazil.
Ama-Olympics la aqala mhlaka 5 kusiya ku21 Ncwabakazi.
Iqembu lamaMighty Warriors lenza imbali ngokuba ngelakuqala elenguqu ukuncintisa kulumkhosi. IZOC izathumela abadlali abangamatshumi amabili lanhlanu, okuliqula elikhulu ukwedlula wonke kusukela ngo1980.
AmaMighty Warriors leBanyana Banyana eyeSouth Africa yiwo wodwa amaqembu eAfrica kunguqu yamantombazana.
Isizwe seZimbabwe silemendulo eziyisitshiya galombili, phakathi kwalezi, uKirsty Coventry uleziyisikhombisa azithola ngo2004 eAthens lango2008 eBeijing. Eyinye imendulo yegolide yatholwa yithimu yamantombazana e-hockey ngo1980.
IZOC ibike ukuthi ayizihluphi ngokufuna imendulo ezinengi kumkhosi walonyaka ngoba inhlanganiso le ihlele ukucubungula indlela abadlali bakuleli abaqhuba ngayo nxa bencintisa kusigaba esikhulu semidlalo.
“Sibone kungcono ukuthi singazikhami ngokufisa ukuthola imendulo ezithile. Abadlali sifuna bazinikele, bazibone ukuthi bakusiphi isigaba sokuncintisa. IZOC izakhangelisisa ukuncintisa kwalababadlali, sihlele indlela esingalungisisa ngayo. Ngokugcweleyo, abadlali besizwe sebelungele ukuyakwenza kuhle eBrazil,” kutsho uAnna Mguni umaqhuzu weZOC.
UMguni ubike ukuba inhlanganiso yabo ayisoze iqine ngokukhangela imncintiswano yalonyaka kuphela kodwa iphezulu kokubumba abadlali abazanctisa kumaOlympics azayo.
“Injongo yethu ayikho kubadlali laba abazakuyancintisa eRio. Sikhangele labo abasakhulayo. Amaphutha lakho konke okuhle okuzaphuma eRio kuzasetshenziswa ukubumba lokulolonga amathimu alandelayo.”
UMguni uthe ngemva kwama-Olympics bazaqhubeka bekhankasela ukuthuthukiswa kohlelo lweZOC olubizwa ngokuthi yi-Grassroots Development oluhlose ukulolonga abasakhulayo.
“Kuhlelo lwe-Grassroots sikhangele ukuphathisa abadlali abasacathula esibabona belethalenta okuyamela iZimbabwe. Abadlali laba bazakhethwa kumincintiswano eqhutshwa yizabela efana lamaYouth Games lasezikolo, ngemva kwalokhu, kuzabunjwa ithimu.”
Ebika mayelana ngamalungiselelo wohambo lokuya eBrazil, uMguni uthe: “Kumele kusiyafika umhlaka 3kuNcwabakazi abadlali labaphathi bamathimu sebefikile eBrazil. Okwamanje sisaqedisa ukulolonga kubadlali abakuleli. Silabanye abadlali beZimbabwe abakade belolongela bekwamanye amazwe, labo silethemba lokuthi sebeqedisa.”
Online Reporter