admin
Cornelius Luphahla
KULENDODA yeSiphezini eMzingwane District ebisilesikhathi eside ilala ngaphandle kwengubo ngenxa yenyoka ebixotshisa abantwabayo imisebenzi njalo kucatshangelwa ukuthi ibisiyithembisa ukuyisa kogoqanyawo.
Inyoka le okuvele ukuthi libululu ngekaMnumzana Tembo njalo ibisilesikhathi eside imhlupha okuyikho okwenze waze wadinga uncedo kubaphurofethi abavakatshe kule indawo ngeviki ephelileyo.
Inyoka le kubikwa ibihlala phakathi kwe-trunk elezipanela.
UMthunywa uzwe ukuthi inyoka le ebusuku ibikhukhumala ilingane lembuzi ithembise ukubulala umnikazi.
UMthunywa uvakatshele kule indawo waxoxisana loMnumzana Thembelani Mkhwebu oveze ukuthi kalankani ngendaba le.
“Mina kangizange ngizwe indaba le kodwa ngazibonela ngawami la (etsho ekhombela amehlo akhe). Abaphurofethi baveza ukuthi inyoka kaTembo ibisixhwalile.
“Into eyangimangalisayo yikuthi inyoka le yayincane isenela phakathi kwe-trunk kodwa isibanjwe ngabaphurofethi yakhukhumala yaba nkulu okwesabekayo.
“Lapho-ke yayisitshinga sifuna ukubaluma. Abaphurofethi laba bathwala nzima ukuthi bayitshise baze bayibambisana okuyikho abenelisa khona ukuyitshisa,” kutsho uMnu Mkhwebu.
UNkosazana Tracy Ngwenya oyisakhamuzi kule indawo uveze ukuthi uMnu Tembo wabikela abaphurofehi ukuthi inyoka le isimkhathazile yikho esedinga uncedo lwabo.
“UTembo wabikela abaphurofethi ukuthi inyoka yakhe ibisimthwalise nzima ngoba ubengasalali ebusuku ifuna ukumginya.
“Abaphurofethi labo bamtshela ukuthi inyoka le ibisiza mbulala njalo yiyo ebibangela ukuthi abantwabakhe bengasebenzi,” kutsho uNkszn Ngwenya.
Ebuzwa ngale indaba uMnu Tembo uvumile ukuthi kwakhitshwa inyoka emzini wakhe kodwa walandula ukuthi ubelolwazi layo.
“Kuliqiniso sibili ukuthi abaphurofethi bakhipha inyoka endlini yami phakathi kwe-trunk yezipanela kodwa mina ngangingayazi. Inyoka le kwathiwa yiyo exotshisa abantwabami emsebenzini.
“Lokhu ngiyakukholwa sibili ngoba umntanami uNdodana ubuye lapha kumnyaka ophelileyo evela eSouth Africa ethi usebuyela emsebenzini kodwa wathi efika bamxotsha. Ngalokhu kusobala ukuthi inyoka le yiyo eyayimthelele umnyama wokuxotshwa umsebenzi,” kutsho uMnu Tembo.
Induna yakulesisisiqinti uMnumzana Zephania Sigola ebuzwa ngale indaba uvumile ukuthi yenzakala wathi kodwa wayengekho ngalelolanga.
“Indaba yokukhitshwa kwenyoka koTembo ngayizwa kodwa mina ngangingekho ikhutshwa ngezwa sokukhulunywa kuphela,” kuphetha induna uSigola.
Online Reporter