Akulinywe zonke izilimo ziyavuma

Johas Moyo
INHLANGANISO yePractical Action Project ebona ngokulinywa kwezilimo ezehlukeneyo ikhuthaza abalimi ukuthi baqalise ukulima izilimo ezitshiyeneyo ngoba ilanga selitshisa njalo izilimo zisenza kuhle ngalesisikhathi.

Ekhuluma loMthunywa uMnumzana John Siambare onguPractical Action Project Officer esabelweni seMatabeleland South ukhuthaze abalimi  ukuthi baqalise ukulima izilimo ezitshiyeneyo ngoba zisenza ngcono ngesikhathi sokutshisa.

“Sikhuthaza abalimi ilizwe lonke jikelele ukuthi balime ngamandla ngoba umqando obukade ubabuyisela emuva usudlule.

Umqando uyaphambanisa ukukhula kuhle kwezilimo kodwa umumo osukhona khathesi ufanele izilimo,” kutsho uMnu Siambare.

Uqhubekele phambili ekhuthaza abalimi ukuthi balime bekumaqembu ukuze benelise ukusebenza ndawonye labalimisi abaseduzane labo ngoba belakho ukubabela ulwazi ngezokulima.

“Abantu kabaqalise amaphurojekithi okulima ikakhulu labo abalezivande zomphakathi kuqakathekile ukuthi bahlangane njalo bahlanganise izilimo zabo ngoba kungasela silimo esingenzi kuhle ngalesisikhathi sokutshisa.

“Lokhu kwenza lalabo abangela lwazi ngezokulima benelise ukuthi bafunde njalo bafundiswe kuhle ngokulima,” kutsho uMnu Siambare.

Uthe njengoba selitshisa ilanga lokho kutsho ukuthi labalimi kumele bathelele kakhulu izilimo zabo ukuthi zingatshi njalo zenelise ukwenza kuhle.

“Abalimi kabaphangise ukuhlanyela izilimo zabo ngoba khathesi amanzi (water level) endaweni ezinengi asesekhona.

Lokho kwenza ukuthi basebenze kuhle njalo kuthi nxa ilanga selitshisa kakhulu izilimo zabo ziyabe sezibambile laloba amanzi ayabe setholakala khatshana.

Lokhu kwenza njalo isivuno sibe phezulu,” kutsho uMnu Siambare.

Uphethe ngokukhuthaza abalimi ukuthi bavikele izilimo zabo ngokufafaza imithi efaneleyo ukuze babulale izibungu lemihogoyi ehlasela izilimo zabo ngalesisikhathi.