admin
Johas Moyo
INHLANGANISO ekhangela ngezokulima eyeAgritex esabelweni seMatabeleland ikhuthaza abalimi ukuthi balime izilimo ezingadingi izulu elinengi ngoba sekuvamile ukuthi izilimo zabo zitshiywe lizulu zingakavuthwa kuhle.
Ekhuluma loMthunywa uMnumzana Dumisani Mbiko-Nyoni ongu-Matabeleland North Chief Agronomist uveze ukuthi abalimi kabafundiswe ngenhlabathi yakibo, lokho kuzakwenza ukuthi bengahlaselwa yindlala ngoba kuyabe sekuyinjayelo kibo ukuthi bazi izilimo ezivumayo enhlabathini yakibo.
“Sekukanengi sicebisa abalimi ukuthi balime izilimo ezimelana lokoma ezigoqela amabele, inyawuthi, indumba, amazambane kanye lendlubu ngoba kusenelisa ukuthi kuhlale kunganethwanga okwesikhathi eside,” kutsho uMnu Nyoni.
Uqhubekele phambili ngokukhuthaza abalimi ikakhulu labo abafuna ukulima izilimo zokuthengisa ukuthi bengalima utshinda ngoba lalo lwenza ngcono.
“Sikhuthaza njalo labo abalima indawo ezinkulu bethengisa ukuthi balime utshinda ngoba lusenza ngcono njalo luyamelana lokoma.
“Njalo sekunanzelelwe ukuthi utshinda lwenza kuhle laloba luthole amanzi amalutshwana kalwandisanga ukufa, ngokunjalo sikhuthaza abalimi abalimela ukuthengisa ukuthi balulime ngoba lumelana lomhlabathi ongela zulu elinengi,” kutsho uMnu Nyoni.
Uthe abalimi kabazuze ulwazi ngokuthi izulu endaweni yabo lina kusukela nini kusiyafika nini njalo ngomnyaka bathola izulu elinengi ngakanani lokho yikho okwenza benelise ukuhlela izilimo zomnyaka wabo okuzenza baqede indlala.
“Abalimi bangabalolwazi ngomumo womkhathi lokho kuzabanceda ukuthi benelise ukulima izilimo zabo ngenhloso yokuhambisana lamanzi ayabe ekhona ngalowo mnyaka njalo akusoze kubahluphe ngoba bazenelisa ukuthi bathengiselane labomakhelwane babo abaseduze ukudla okuyabe kungavumanga endaweni yabo,” kutsho uMnu Nyoni.
Uphethe ngokukhumbuza abalimi ukuthi bangekeli ukudinga ulwazi ngomumo wezulu bengakaqalisi ukulima ngoba lokhu kuzabaphathisa ukukhetha izilimo ezizenza kuhle kulowomnyaka.
Online Reporter