Online Reporter
Nkosilathi Sibanda lo-Innocent Kurira
UMQEQETSHI weSimba Bhora uJoel Luphahla usebike ukuba kasoze ahlale phansi, agoqe izandla kumdlalo wabo leHighlanders.
Uthe ufuna ukuyibhaxabula, isuke enkundleni yeWadzanayi ingechumileyo. Umqeqetshi lo ukhangelelwe ukuthi athole imiklomelo yonke, aqede isizini ebalelwa kubaqeqetshi abenze kuhle kulisizini.
ULuphahla wakhulela kuHighlanders, iqembu alidlalelayo, waphinda waliqeqetsha. Ulomlandu wokuthi aqede isizini kakuhle, iSimba Bhora igcine isithunzi sayo njengentshantshu zika2024 zeligi yeCastle Lager.
Ubike ukuba ngeke ayixolele iHighlanders, loba kuliqembu akhulela kulo.
“Ngumdlalo onzima esiwulandayo ngempelaviki. Siyazi ukuthi iHighlanders ikusimo esibi kulogu. Umdlalo lo ungifaka egcekeni ngenxa yokuthi ngake ngaba lobudlelwano leqembu leli. Kodwa ke, akuncengwana la. Akula buhlobo emdlalweni. Ngizakhuza abadlali bami ukuthi bazame ukuhlohla, siyinqobe iHighlanders,” kutsho uLuphahla.
Okwakhathesi kusele imidlalo eyisithupha ukuthi kugqitshwe isizini. ISimba Bhora ikunombolo yesibili kungalane yamaqembu kuCastle Lager Premiership. Kukhokhela iScottland ngemiklomelo engu-62, yona ile-56.
l iqhubeka kukhasi 9
“Ngumdlalo ozaletha imizwa ethile kodwa kumele sinqobe. Sesihlale isikhathi eside singanqobi ngakho kuzafiwa ngempelaviki. Kumele silungisise okusehlulayo,” nguLuphahla lo.
Ubike ukuba balokholo lokuthi bengaqeda bengebanqobi besicoco seligi.
“Sesidlalela imiklomelo eyisitshiya galolunye njalo sikhona emncintiswaneni wesicoco esikhulu. Sizathola icebo lokunqoba yonke imidlalo.”
Ngesikhathi iSimba Bhora ilungiselela ukuthi ibe yintshantshu, iBosso ngakolunye uhlangothi ifuna ukuthi idlalele ukuqeda ikunombolo engcono. IBosso ibalelwa kulezo ezingaqunywa lizembe, loba ikunombolo yetshumi. Ilemiklomelo engu-36.
