Online Reporter
Fungai Muderere
“IQINISO libuhlungu kodwa kumele likhulunywe.
Akulalutho kuHighlanders. Sengihlohle angu-40 ku-social, bona bayehluleka.
Ngicabanga ukuthi ngiphenduke . . .”
Amazwi la aphume kuNjabulo “Tshiki” Ncube owake wadlalela iHighlanders, wazakhela udumo, wabayintandokazi yabalandeli.
Uthe ukhathazwa yikuthi abadlali beHighlanders bayehluleka ukuhlohla, okuveza ukuthi kayilabadlali ababukhali, abawomele igedi.
Ubika ukuthi sekumehlula ukuthi aqede ukubukela umdlalo nxa iqembu liseBarbourfields ngoba iHighlanders “imtshila umoya”.
UNcube, oleminyaka yokuzalwa engu-43, uthe umangaliswa yikuthi yena usehlohle amabhola angu-40 kumidlalo yobungane emalokitshini, kodwa akulangitsho umdlali weBosso osefikise alitshumi.
“Kubuhlungu.
Kungizwisa ubuhlungu ukubona abafana besehluleka ukunqoba.
Abagadli abekho bukhali. Ngingcono ngoba sengihlohlele iqembu lami angu-40 kumidlalo ye-social.
Kwesinye isikhathi ngisuka ngicabange ukuthi ngiphenduke emdlalweni,” kutsho uNcube, ngesikhathi ekhuluma leZimpapers Sports Hub.
“Kabangibize ngizotshengisa abafana ukuthi kwenziwa njani phambili kwegedi.
Abalandeli bafuna ukubona okungcono emdlalweni. Angeke sivumele ukuwa kweqembu sikhangele.
“Kuyacunula, kukukhiphe emdlalweni ukubona ikilabhu yethu isehlulwa isekhaya.
Abadlali badinga ukutshelwa ukuthi badlale ngokuzimisela ngoba iqembu leli likhulu, ngelabanikazi, kumele belwe enkundleni.
Iqembu selidonse isikhathi eside lilendlala yempumelelo.
Abafana kumele bakhuthazane, baqhubeke.
Balawo amandla okwenza kuhle.”
