admin
YiNtatheli kaMthunywa
INHLANGANISO yeZimbabwe Football Association (Zifa) ibika ukuba iphakathi kwamalungiselo okuthi ibhola libukelwe kumabonakude mhla isizini ivulwa.
IZifa ithe inyathelo leli lizaphathisa njalo lamaqembu adlala kuligi yeCastle Lager Premiership.
Okwamanje inguqu ayidlalwa kulandela ukumiswa kwemidlalo ngenxa yeCovid-19.
Ekhuluma lentatheli, uMkhokheli weZifa uFelton Kamambo uthe kungumbono wabo ukuthi balandele okwenziwa ngamanye amaligi aqakathekise ukusakazwa kwemidlalo kuTV, njengoba kungavunyelwa ababukeli enkundleni.
Okwamanje akwaziwa ukuthi umdlalo wenguqu uzaphenduka nini kodwa kuzwakale ukuba inkokheli zifuna ligiqwe ekupheleni kukaMpandula.
Inkampani zabomabonakude ezizasakaza azikabikwa. UKamambo uqine ngokuthi kusadingwa amaqhinga.
“Okwakhathesi angeke siveze esisebenza labo kuloluhlelo,” kutsho uKamambo ezama ukuthi acacise inyathelo labo lokusakaza imidlalo.
“Esikufunayo yikuthi imidlalo yethu iphume kuTV. Sisakhuluma ngakho njalo nxa kuhambe kuhle, sizalazisa.”
Uthe ukusakazwa kwebhola kuzaphathisa lamathimu akuPSL.
“Okusalayo yikuthi lamaqembu akuPSL azangeniswa ehlelweni …,” nguKamambo lo.
Kusenjalo, kulodletshana lokuthi inhlanganiso yePSL isikhulumisana lengatsha zonke zomdlalo kanye loHulumende ukuze kubunjwe iqhinga lokuvulwa kwesizini.
Ukuqala kwebhola kuzamele kulandelwe isinqumo zokuhlanzeka eziphawulwe yinhlanganiso yeWorld Health Organisation ukuze kuvikelwe igcikwane leCovid-19.
UMthunywa uzwe ukuba iPSL ifuna ibhola liqale ekupheleni kwalinyanga kumbe ngoMfumfu.
Isimo esibhekane lamaqembu amanengi kuleli yikuthi awalamali. Ukudlala kungela ababukeli kumbe abasekeli ngeke kuncede ngoba yikho lapho amaqembu athola khona imali.
Online Reporter