admin
Nkosilathi Sibanda
NGESIKHATHI amanye amathimu enguqu kuleli ebumba njalo elokulolonga abadlali bawo, iChicken Inn isiveze ukuthi isisuthisekile ngabadlali bayo balisizini.
Umqeqetshi wayo uJoey Antipas wengezelele ngokuthi kaboni isizatho sokuthi adinge abanye abadlali kulabo abakhona.
Ekhuluma ngesikhathi evela kukhefu kuliviki, umqeqetshi lo uthe akasela ndaba lokunengi ngaphandle kokuthi aqinise ithimu aseyikhethile ukuthi iyedibana leMamelodi Sundowns mhlaka 16 kunyanga ezayo emagumeni eBarbourfields kumdlalo weCaf Champions League.
AmaGamecocks azamela iZimbabwe kumqhugelwano omkhulu weConfederations Cup odlalelwa zintshantshu zamaligi emazweni wonke adlala inguqu eAfrica.
U-Antipas ube lengxoxo loMthunywa kuliviki lapho umqeqetshi lo aveze ukuthi kasoke ayehlise amajogwe.
Umqeqetshi lo usengena kumkhankaso wenkezo yeConfederations okwesibili lokhe waqala ukuqeqetsha kuligi ephakemeyo. Ngomnyaka ka2010 wathwala inkezo yePSL ekhuza iMotor Action, iqembu ahamba lalo kumidlalo yeAfrica.
Uthe uzitshaya isifuba ngokudlala okwenziwe ngabadlali bakhe njalo akethuki lutho mhla abafana bakhe bengqikilana lamathimu akwamanye amazwe.
“Sengikhangele okuphambili ngoba ukulungiselela kwethu imidlalo yeConfederations Cup ngikuqakathekisa ukwedlula konke khathesi. Angiboni ukuthi ngizadinga abanye abadlali. Abakhona bayenelisa bonke.
“Ukulungisisa ithimu yikho okusehlelweni lwethu njengabaqeqetshi. Inkokheli zethimu sezitsheliwe lokho esifisa ukukwenza kumalungiselelo abo,” kutsho uAntipas.
Umqeqetshi lo uthe iqembu lakhe ulibona lisedlula izigaba zakuqala zomncintiswano weConfederations Cup.
Nxa iChicken Inn ingadlala ngokufisa komqeqetshi wayo, kuzamele izimisele ukuhlangana lenkunzi zomdlalo ikakhulu lezo ezidlala enyakatho yeAfrica.
Lenkokheli zeChicken Inn zithabe zimanzi ngokubizwa ngentshantshu yenguqu yeZimbabwe.
Umgcinisihlalo wethimu uLifa Ncube uthe iqembu labo selimelele ukwenza izimanga.
“Ngemva kokubona abafana bethu benqoba kuligi yePSL, ngizizwa ngijabulile. Akula mgcinisihlalo wenguqu othabe ukwedlula mina,” kutsho uNcube esecingweni.
Kusenjalo, uNcube uthe bazasebenzelana lomqeqetshi, benze konke okufunwa liqembu kumalungiselelo.
Uthe kayibuyeli emuva ngokulolonga njalo kungenzeka ukuthi kube lenkamba yokulolonga ngaphandle kwelizwe.
“Siphakathi kokubonisana labaqeqetshi bethu, mhlawumbe ithimu ingalolonga okwesikhathi esithile ingaphandle kwelizwe. Lokhu sikwenza sikhangelele ukuthi abadlali bajwayele ezinye inkundla zeAfrica. “Sizabona okuzavuma, inhloso yikulungiselela lokwenza umbono wabaqeqetshi.”
Umgcinisikhwama wethimu uMlungisi Moyo uthe bayafunga ngakho konke abalakho ukuba bazafika kuma-final ayo yonke imncintiswano kusizini ezayo.
“Okwamanje amalungiselelo eAfrica asegiyeni eliphezulu. Lonyaka ngumnyaka wethu futhi. Inguqu edlalwa yiChicken Inn isitshintshile. Ngokubona kwami amanye amathimu sizawathwalisa nzima, siqeda umncintiswano weCaf sizabe sesilembali engcono,” kutsho uMoyo.
Online Reporter