admin
NguLungelo Ndhlovu
U-LUKE Masomere uthi umdlalo weqembu lakhe leHow Mine ebelibhuqana leBosso ngeSonto edluleyo, kumdlalo weZimbabwe National Army Charity Shield, ubungowokulungiselela iligi yePremier Soccer League (PSL) nje kuphela ngakho abalandeli benguqu basazolibona kuhle iqembu lakhe.
Iqembu leHow Mine libhekane lomdlalo walo omkhulu wePSL kuviki ezayo, lapho elizabhuqana leqembu leChapungu enkundleni yeLuveve.
“Iqembu lethu lidlale kuhle sibili ngoba besilamaviki amathathu singazange saligiqa ngenxa yokuthi abanye abadlali bami bebelimele. Indlela abafana bami abadlale ngayo iyangithokozisa iloba nje iqembu leBosso libe lenhlanhla yokuthi lihlohle ibhola elilodwa.
“IBosso ihlohle ngenhlanhla njalo ngicabanga ukuthi iqembu lami lidlale kuhle okwamagama. Lami bengingakhangelelanga ukuthi abafana bengadlala kamnandi kanje. Nginanzelele kakhulu amaphutha ethu emdlalweni lo njalo sizakulungisisa konke lokhu, kuthi nxa sesingena kuPSL siyabe sesisenza umsebenzi,” kutsho uMasomere.
Lonyaka kuzadabuka amabhulugwe kuPSL ngeqembu leHow Mine, elilengcitshi zabadlali abaligiqa kamnandi, ezibalisela uKudakwashe Musharu, uBenjamin Marare, uCharles Sibanda uTimothy January, Munyaradzi Diya kanye lo Limited Chikafa.
“Ngiyazi ukuthi kungathatha isikhathi ukuphola kwabadlali bami abalimeleyo abathi uMparati, uChikafa kodwa silabo abanye abadlali esizabasebenzisa kuPSL nxa belokhe bengezwa kuhle,” kutsho uMasomere.
Online Reporter