admin
YiNtatheli kaMthunywa
INHLANGANISO ecubungula ngezokulima eyeMatopos Research ikhuthaza abalimi bembuzi ukuba basebenzise ama-kid boxes ekugcineleni amazinyane asanda kuzalwa kunye lokuthi bawananzelele kakhulu nxa izulu lisina.
Ukucubungula okwenziwa yinhlanganiso le kuveze ukuthi amazinyane angaba yi-60% ayafa engekafiki inyanga ezintathu ezelwe ngenxa yokuba abalimi kabawanakekeli.
Ekhuluma loMthunywa uNkosazana Thabile Nyoni onguResearch Officer uthe isikhathi esinengi abalimi bavame ukungabi lendaba lamazinyane abo okuyinto ecina idala ukuba afe.
“Nxa izinyane lisanda ukuzalwa kumele limunyiswe masinyane umthubi kunina ukuze lithole amasotsha omzimba azalivikela ekubanjweni yimikhuhlane. Amazinyane atshiywe ngonina umlimi kumele awamunyise kwezinye imbuzi kumbe awasengele uchago,” kulandisa uNkszn Nyoni.
Kubikwa kuqakathekile ukuthi amazinyane avalelwe wodwa ukuze angadliwa zinyamazana zeganga. Amazinyane angavalelwa kuzakhiwo ezibizwa ngokuthi ngama “kid boxes” kumbe njalo enzelwe izibaya ezincane lapho okungasoze kungene lutho khona, akhitshwe kuphela nxa esemunyiswa.
“Nxa amazinyane engahlala wodwa engalandeli onina kubalula ukuthi umlimi ananzelele imikhuhlane engasuka iwahlasele enjengesihudo, njalo lokhu kuyawavikela ekudliweni zinyamazana,” kuchaza uNkszn Nyoni.
UNkszn Nyoni uqhubekele phambili wachaza ukuthi izinyane liyakhula lifike esikhathini sokuthi sokumele liyekeliswe ukumunya lokhu okuthiwa yikuphusisa.
“Nxa izinyane selisenelisa ukuphila ngokunye ukudla liyaphusiswa. Indlela zokuphusiswa zinengi, ziya ngokuthi umlimi yena vele ugcina njani izifuyo lezi. Izinyane livame ukuphusiswa nxa selilamalanga angu-90 kusiya ku-100 lizelwe. Lokhu kuyancedisa ukuthi unina aphumule alungele ukulandelwa eseqinile,”kutsho uNkszn Nyoni.
Ukhuthaze abalimi ukuthi bananzelele indawo ehlala amazinyane abo ngoba akumelanga aminyane endaweni encane ngoba lokhu kwenza imikhuhlane imemetheke lula njalo abalimi kumele baqaphele imkhuhlane efana lesihudo.
Online Reporter