adminI-ORLANDO Pirates kufanele iphume iyoqedela umsebenzi omuhle ewuqalileyo kuCaf Confederations Cup ngokutsho kukanozinti waleli qembu uBrighton Mhlongo.
IBucs izodlala umlenze wesibili we-final kuConfederations Cup le-Etoile du Sahel yaseTunisia eSousse ngeSonto ngo-8.30 ebusuku.
Lumdlali ungomunye wabadlali abasize leli qembu ukuthi lifike lesigaba senkezo. Leli qembu (iBucs) likhangelane lomsebenzi onzima wokutshaya elaseTunisia enkundleni yalo njengoba lehlulekile ukukwenza lokho e-Orlando Stadium, eSoweto, ngoMgqibelo.
IPirates le-Etoile zibambane nge 1-1 emdlalweni, emlenzeni wokuqala okuchaza ukuthi nxa umdlalo ungaphela kungu- 0-0 eTunisia kuyoba kubhedile kwezika-Eric Tinkler.
Kufanele batshaye leli qembu elingakahlulwa kulumqhudelwano emidlalweni eyisikhombisa eliyidlalele ekhaya.
Kodwa uMhlongo uyalethemba iqembu lakhe ukuthi lizoqhubeka ngokwenza kahle.
“Kumele siphume siyoqedela umsebenzi wethu ebesesiwuqalile njengeqembu. Sikhangele ukuthi sinqobe lumdlalo sibuye lendebe ngemuva kokuhamba ibanga elide kulomqhudelwano. Le ndebe iliphupho likasihlalo weqembu u-Irvin Khoza, akufanelanga simphoxe ngoba kudala eyifuna eyinye indebe yase-Africa,” kutsho uMhlongo.
IPirates yacina ukuphakamisa indebe yase-Afrika ngesikhathi yemuka leCaf Champions League ngo-1995.
UMhlongo uthe usekulungele ukudlala umdlalo wonke wathi usemelele umqeqetshi uTinkler ukuthi amfake kuqembu.
“Bengidlala kakuhle. Sengilinde ukutshelwa ngumqeqetshi ukuthi angifake kuqembu elizadlala ngoba nguye ozothatha isinqumo. Nxa ngingalithola ithuba lokuthi ngidlale ngizolibamba ngazo zombili kodwa uma kuvimba uFelipe Ovono laye ngizomseka ngokupheleleyo ukuthi enze umsebenzi ngendlela ukuze sikwazi ukubuya lendebe,” kutsho uMhlongo.
Unozinti lo ungomunye wabadlali bePirates abanqobe umklomelo i-Excellence Award ngesikhathi kulomcimbi weSA Sports Awards eMangaung, ngeSonto ebusuku. Ubehamba loLucky Lekgwathi lokaputeni uHappy Jele bezothatha umklomelo lo.
“Sizizwa sihloniphekile. Kuyasikhuthaza ukuthi siqhubeke ngokwenza kahle emiqhudelwaneni yase-Afrika. Sibonga uNgqongqoshe wethu uFikile Mbalula ngokuthi asinikeze inhlonipho emgaka labanye sisebenzelana labo,” kutsho uMhlongo.
Online Reporter