Online Reporter
Enye indlela yokwakha amabizo yikuphinda isiqu sebizo. La ngamabizo akhomba ubunengi obubabazekayo kumbe obumangalisayo. Sonke isikhathi nxa kuphindwa isiqu sebizo, lelobizo kumele libe sebunengini.
Izibonelo: izintaba > izintabantaba –izintaba + intaba >izintabantaba; amadwala >amadwaladwala – amadwala +dwala> amadwaladwala; amaviyo >amaviyoviyo –amaviyo +viyo >amaviyoviyo
Kodwa nxa isiqu sebizo silelunga elilodwa, sithi lapho sisiphinda sifake u-y- phakathi. Izibonelo: izindlu >izindluyindlu – izindlu + yi +ndlu >izindluyindlu; imizi >imiziyizi – imizi +yi +zi >imiziyizi
Sinanzelela ukuthi nxa kuyisenzo esilesiqu esiphindwayo, ukuphinda lokho kuyabe sekusitsho ukwenza into kancinyane. Isibonelo: hamba > hambahamba – hamba +hamba > hambahamba.
Isilisa lesifazane: Zonke izinto eziphilayo zingehlukaniswa kabili, kungabakhona isilisa lesifazane. Kujayelekile ukuthi kubekhona ibizo elimele umhlobo webizo kodwa lingachazi ukuba yisilisa kumbe yisifazane. Ibizo elinjalo sithi liveza ubulili bonke, okutsho ukuthi alehlukanisi isilisa lesifazane. Nanzi izibonelo zamabizo ayibulili bonke: inkukhu, umuntu, inja, inkomo lamanye.
