Online Reporter
Zimpapers Sports Hub
WATHI ekhethwa ukuba ngumongameli wenhlanganiso yeZifa, uNqobile Magwizi wabika ukuba uzimisele ukusebenzela ilizwe, lokuthi amaqembu akuleli athole ukunqoba kuzo zonke izigaba zemincintiswano.
Imizamo yakhe kulokhu ibonakele, nanko usehambe amazwe ekhombisa abadlali abasakhulayo, abayizizalwane zakuleli abahlala phetsheya ukuthi bayingxenye yeqembu lamaWarriors.
Phezulu kwalokhu, iZifa njengenhlanganiso isiguquka kwelingcono ngokuya kwesikhathi, lokhu kwangena uMagwizi lequla lakhe mhlaka 25 Zibandlela lonyaka.
IZifa kuliviki yethule umbiko wokuthi isiqoqe imidlalo yobungane phakathi kweZimbabwe leBurkina Faso mhlaka 6 Nhlangula, leNiger mhlaka 10 Nhlangula. Lokhu ngokunye kwemisebenzi yeZifa yokulungiselela imiqhudelwano yamazwe ezayo.
“Siyajabula ukwazisa ngokusemthethweni ngemidlalo emibili yobungane ezayo kuqembu lelizwe leZimbabwe elabesilisa, amaWarriors, njengengxenye yamalungiselelo aqhubekayo emidlalo ezayo.
“AmaWarriors azakuya edolobheni leCasablanca, eMorocco ukuyadlala leBurkina Faso leNiger,” kutsho lumbiko.
Kumidlalo le, umqeqetshi uMichael Nees uzahlola abadlali bakhe, abelethuba lokubumba iqula elizwisisana enkundleni lasekulolongeni.
Kusenjalo, uMagwizi, umsekeli wakhe uLoveness Makura lonobhala weZifa uYvonne Manwa basemhlanganweni we75th FIFA Congress eAsunción, Paraguay.
Umhlangano lo uqale ngoLwesithathu, uphele ngoLwesine kuyonale iviki. IFIFA Congress ngumhlangano obaluleke kakhulu ekwakheni ubudlelwano lezinye ingatsha zomdlalo lokunikeza inkokheli ithuba lokufunda okuthile kwamanye amazwe.
Kumbiko ngaloluhambo, uMwana uthe:
“I-ZIFA igxile ekuthuthukiseni ubudlelwano bayo emphakathini webhola emhlabeni. Umhlangano lo uyibufakazi bokuzinikela kwethu ekuphakamiseni izbhola laseZimbabwe kunye lokufaka isandla ekubuseni kwenhlelo zomdlalo enhlabeni.”
Ukuba khona kwenkokheli zeZifa kulumhlangano kulo kugcizelela njalo ukuzinikela kwayo ekuphatheni ibhola elilenhlelo ezilempumelelo ephathisa abadlali. Kuphinda kubeke iZimbabwe njengelunga elikhutheleyo ekuthuthukiseni inguqu.
