Online Reporter
Sithathela kusifundo sethu seviki ephelileyo kuthiwa akhona amanye amabizonto akhiwa ezenzweni kodwa unkamisa wokucina wesenzo engaguquki njalo kungajotshelelwa, kodwa kuqaliswe ngesiqalo sebizo esifaneleyo.
Izibonelo: themba >ithemba, lima >ilima, phehla >iphehla, hlola > umhlola. (i) +themba >ithemba; um+hlola>umhlola.
Akhona amabizonto athathelwa kwamanye amabizo ngokusebenzisa isiqalo sesinye isigaba, isibonelo: 7 lo 14. Amabizo la andise ukukhomba indlela yokwenza ulutho loba umkhuba. Umuntu >isintu, Ubuntu; ikhaya >isikhaya, umlungu >isilungu
Isi- +(um)lungu >isilungu; isi-+(i)khaya> isikhaya.
Akhona amabizonto esigaba 14 akhiwe ngokusebenzisa isabizwana soqobo. Esabizwaneni soqobo kuqaliswa ngesiqalo sesigaba 14: mina >ubumina, khona > ubukhona. Akhona awesigaba 14 athathelwa eziqwini zesiphawulo lesibaluli. Eziqwini zesiphawulo: khulu >ubukhulu, hle> ubuhle, ubu- +-nengi > ubunengi.
Eziqwini zesibaluli: -mnandi > ubunandi, -banzi >ububanzi, ubu-+qotho>ubuqotho. Ngeziqu zesichasiso kungakhiwa amanye angayisiwo awesigaba 14: -nengi >inengi –(i) +nengi > inengi; -dala >isidala njalonjalo – isi+ -dala >isidala.
Amabizonto akhiwa kusetshenziswa izandiso zemvelo ngokuqalisa ngesiqalo sebizo esivumayo: phezulu >umphezulu, phansi >iphansi, ubuphansi, ntambama >intambama njalonjalo. Akhona amabizonto akhiwa ngezenzukuthi ngokuqalisa ngesiqalo sebizo esivumayo: bani >umbani; vuthu >imvuthu. Sizaqala lapha kunsuku ezilandelayo.
