Online Reporter
Nkosilathi Sibanda
AMANZI yimpilo, kwabanye libhizimusi.
Lokhu yikho osekusenzakala elokitshini lePumula East koBulawayo lapho izakhamizi esezikhonona ngokuswela amanzi okwamalanga amanengi, osekudale ukuthi kwande ‘osomabhizimusi’ abathengisa amanzi.
Kubikwa izakhamizi zakulindawo zilakho ukuhlala amaviki phose amabili zingela manzi aphuma empompini zekhansili.
Ngenxa yalokhu, sekulabantu abathwala amanzi besuka kwezinye indawo, besiyawathengisela izakhamizi zePumula East.
Izakhamizi ezingelamanzi sezikhetha ukuthi zilindele ukubuya kwalabo abathengisa amanzi. Abathengisa amanzi laba bawakhelela kumabhakede lezigubhu, bawathwale ngenqola kumbe izimota. Amanzi athengiswayo la kwezinye izikhathi ngawekhansili kumbe ngawesibholane athathwa emalokitshini ayabe elamanzi ngaleso sikhathi.
Intengo yehlulekene, i$1 ithenga amanzi okubikwa athethwe esibholaneni, ayisilinganiso samabhakede amathathu.
Ngenxa yokuthi amanzi ayaswelakala okwamaviki, izakhamizi zicina zingela lapho ezingaphephela khona.
Okuzwisa izakhamizi ubuhlungu yikuthi zihlalele evalweni ngoba kazilaqiniso ukuthi amanzi la ahlanzeke okunganani. Kulelilokitshi, izakhamizi zihlanza impahla emaxhaphozini kumbe emagodini agejwa kudala, ziphinde zigezise lemiganu khonapho.
UMnumzala Petros Mwale, oyisakhamuzi sePumula East, uthe sebekhathele ngokuphathwa kabuhlungu yikhansili.
“Siyazibuza ukuthi pho, sisasengabantu bakoBulawayo. Amanzi kaphumi njengokwenzakala kwamanye amalokitshi. Siyaqeda amaviki la, kungela thonsi empompini.
“Sesiphephela kulabo abathengisayo. Basitshela ukuthi idola lithenga amabhakede ama-20 litres amathathu. Sinatha wona nxa silamali. Kungehlula, inengi lethu liqonda ezihotsheni ezisegangeni. Akula ngenye indlela, ikhansili iyasilahlisa la.
“Impompi zethu zomile kusukela ngeSonto eledluleyo. Kwezinye indawo ePumula East sebelamaviki amabili, abanye kabatholi luthi. Kubukeka singathi ikhansili kayisalandeli uhlelo lokuvulwa kwamanzi,” kutsho uMnu Mwale.
Esinye isakhamuzi, uNkosikazi Melani Nxumalo uthe sebejwayele ukusebenzisa amanzi abangaziyo lokuthi avela ngaphi.
“Sizakuthini? Sesinatha aphuma kuzibholane zamanye amalokitshi. Kwesinye isikhathi sinatha lamanye okungaziwayo ukuthi avela ngaphi. Amanzi, ngamanzi loba sisesaba ukugula.
“Ngokujwayelekile siqala ukuthola amanzi ngoLwesithathu kusihlwa kuze kube ngoMgqibelo ekuseni. Kodwa, kumaviki amabili edluleyo amanzi afike kanye okwamahola amathathu.”
Omunye, uMnu Remember Mathonsi uthe uyazisola ukuthi kungani wakhetha ukuyahlala ePumula East.
“Ngilamaviki amathathu ngihlala lapha, ngisuke Entumbane. Ngifice inkalakatha yengozi. Akulamanzi. Lawo akhona ngatholakala ezinqoleni lasezimoteni. Akugezwa la. Ngiyazisola ngokusuka kwami Entumbane ngoba ngale ngangizihlalele kakuhle.
“Lokhe ngifike lapha, ngihlala ngibona abantu begcwele iganga ekuseni lasemini belande ukuyazikhulula ngoba esambuzi akungeneki. Nxa ikhansili ingalungisanga la, imikhuhlane izamemetheka. Sengicabanga ukusuka, ngiye kwelinye ilokitshi,” kutsho uMnu Mathonsi.
Amanye amalokitshi ahlaselwe ludubo olufanayo yiMabuthweni, Iminyela, Magwegwe, Pumula South, Cowdray Park, Nkulumane leMganwini.
Ikhansili yakoBulawayo isibike ukuba iphakathi kwenkinga enkulu ngodaba lwamanzi emalokitshini ngenxa yobhidlika kwempompi ezisusa amanzi emadamu.
Unobhala wekhansili uMnumzana Christopher Dube uchaze ukuthi baphezulu kokulungisa impompi edamu leMzingwane.
“Ngenxa yokufa kwemitshina lempompi zamanzi, udubo lokutholakala kwawo luzaqhubeka, kodwa ikhansili ithanda ukutshela izakhamizi ukuthi umsebenzi uyenziwa. Okwakhathesi ikhansili ihlanganisa konke okufunekayo ukuze kulungiswe impompi,” kutsho uMnu Dube.
Ilokitshi lePumula East lapho okuhlupha khona amanzi lingaphansi kukakhansila uFelix Madzana lokhansila uLazarus Mphadwe, kuWard 18 lo19.
Ekhuluma lephephandaba likazulu, ukhansila uMphandwe uthe: “Bathwele nzima abantu kodwa udaba luyalungiswa. Silesiqiniseko sokuthi ikhansili izaphangisa kulokhu.”
