Online Reporter
Nkosilathi Sibanda
IKHILIKITHI yakuleli isitshengisa impawu zokuphumelela kulandela ukudlala kuhle kwamaChevrons kunkezo yamazwe eye-ICC Men’s T20, kumqhudelwano ose-India laseSri Lanka.
Ukuphumelela kwamaChevrons zindaba ezinhle nanko liphinde latshiya phansi i-Australia, esikhitshiwe emncintiswaneni. AmaChevrons anqoba i-Australia nge-29 runs eColombo ngoLwesihlanu ngeviki edluleyo.
Ekhuluma lentatheli ngemva kokuphumelela ukuya kuSuper Eight, ukaputeni weZimbabwe, uSikandar Raza, uncome ukufinyelela kweqembu lakhe kuSuper Eight okokuqala ku-ICC Men’s T20 World Cup, kodwa wagcizelela ukuthi amaphupho abo awapheleli lapho.
URaza uthe lanxa kuyimpumelelo enkulu ukufinyelela kulesi sigaba somqhudelwano, iqembu lilokuzimisela okukhulu lokwenza okungaphezulu kulokhu.
“Le yimpumelelo esiziqhenya ngayo njengelizwe, kodwa asicini lapho. Sifuna ukuqhubeka sisebenza nzima ukuze siphakamise ifulegi yelizwe enkundleni eziphezulu emhlabeni,” kutsho uRaza.
Wengeze wathi iqembu ligxile ekuletheni udumo olukhulu elizweni kumdlalo wekhilikithi njalo abadlali bazimisele ukulwela impumelelo enkulu kulumqhudelwano.
“Ukufinyelela kuSuper 8 kusese lomdlalo esingakawudlali okokuqala akusiyo into encane. Yimpumelelo okumele ithokozelwe yilizwe lonke labantu bakithi.
“Yebo, ukufinyelela kuSuper 8 kuyimpumelelo eqakathekileyo, kodwa akusikho konke esasizimisele ukukufeza. Lokhu kuyinto eyodwa kuphela esesiyifezile kulokho esasikuhlelile. Kusekhona okunye esifuna ukukuzuza. Sonke sizimisele ukuletha ukuhlonitshwa okukhulu elizweni lethu kumdlalo wekhilikithi.”
Abadlali beZimbabwe benze isimanga ngokunqoba i-Australia bancedisa ukuthi ilizwe lithole indawo kusigaba seSuper Eight.
AmaChevrons athole umklomelo owodwa kulandela ukumiswa komdlalo wabo le-Ireland ngenxa yokuna kwezulu, okwenze kwabalula ukuthi iyephambili loba kusasele elinye ihlandla lemidlalo. Kumdlalo wokucina andubana idlale kuSuper Eight, iZimbabwe izadlala leSri Lanka ngoLwesine, kuthi umdlalo wokucina we-Australia kuyabe kuyikudibana le-Oman ngoLwesihlanu.
