Online Reporter
Brandon Moyo
SEKWADLULA iminyaka engamatshumi amabili iqembu lamaChevrons lacina ukuyanyathela enkundleni zeNgilandi.
Lonyaka kuphelile lokhu, nanko abafana beqembu lelizwe kukhilikithi bakhangelelwe ukuthi badlale leNgilandi kowokuqala ku-test kusukela mhlaka 22 kusiya ku 25 Nkwenkwezi eTrent Bridge, eNottingham
Okwakhathesi, amaChevrons akumalungiselelo edolobheni leLeicestershire, eNgilandi. Kumalungiselelo, amaChevrons azadlala okobungane kuFirst-Class Counties XI okwamalanga amane e-Uptonsteel County Ground eLeicester kusukela mhlaka15 kusiya ku-18 Nkwenkwezi.
Umqeqetshi uJustin Simmons uthe abadlali bakusimo esihle.
“Sihambe kuhle sisuka eHarare sisiya eLeicestershire. Umqeqetshi uCurtly (Diesel, obona ngokuqondiswa kwemzimba yabadlali) ubalolongile ngeSonto sifika. NgoMvulo siqale ukulolongela umdlalo. Siqhuba kakuhle,” kutsho uSammons.
Uthe abadlali balinde ukuyanyathela enkundleni lapho okudlalwa khona ikhilikithi ye-test okuzwayo.
Andubana iZimbabwe ivakatshele eNgilandi, iqembu lisebenze gadalala ukuthi liziqinise lithole lokuzethemba. Lisanda kudlala leBangladesh kunhlelo zonke zomdlalo lapho eliqede lingutshiki lobhanqa.
USammons ulethemba lokuthi bazaphuma lempumela engcono.
“Abadlali bethu balamandla. Bakulindile ukuthi badlale ikhilikithi ye-test leNgilandi, okuyikho okubenza babe ledlabuzane. Kuyakhuthaza njalo kuhle ukuthi nxa ungumdlali ufeze iphupho lakho lokudlala lezinkulu emdlalweni, umhlaba wonke. Phakathi kwamalanga alitshumi esilawo, kumele silolonge okuzwayo.”
Nxa ingadlala leNgilandi, iZimbabwe izadibana leSouth Africa okwamlanga amane kusukela mhlaka 3 kusiya ku-6 Nhlangula. Lo kuzabe kungumdlalo ozancedisa amaProteas kumalungiselelo ayo omdlalo we-ICC World Test Championship le-Australia, enkundleni yeLord’s mhlaka 11 kusiya ku-15 Nhlangula.
