Online Reporter
Ethel Ncube
UMFUYI odumileyo wenkomo zohlobo lwamaBrahman stud eSigodini, usethole isicoco sokuba ngumehluli owenza kuhle kunhlanganiso ye-Brahman Cattle Breeders Society yelizweni leSouth Africa.
UDokotela Themba Dlodlo oseleminyaka engu-36 engumehluli kumncintiswano yokufuya inkomo zama-Brahman stud eSouth Africa, Namibia kunye leZimbabwe, uthole isicoco lesi kumaviki amabili edluleyo.
Ekhuluma lentatheli, uDkt Dlodlo uthe uyathaba ngakwenzelwe ngabafuyi.
“Ngiyabonga futhi ngithabile ngokuthola isicoco esivela kubafuyi beMzansi Afrika ngokunanzelela umsebenzi wami esengileminyaka engu-36 ngingumehluli wabafuyi bamaBrahman emazweni amathathu aseAfrika.
“Isicoco lesi ngisithole eSouth Africa, ngaphansi kweBrahman Cattle Breeders Society of South Africa, siveza ukuba abafuyi laba bayayibona imisebenzi yami njalo lokhu kungenza ngiqhubekele phambili ngokufuya amaBrahman,” kutsho uDkt Dlodlo.
Uqhubekele phambili elandisa ngomhlobo wama-Brahman awafuyileyo.
“Ngifuye amaBrahman enkomo zenyama. Ngakhetha ukufuya wona ngoba kawahluphi, ayaphangisa ukukhula futhi alenyama enengi,” kubika uDkt Dlodlo.
Uqhubekele phambili ekhuthaza abafuyi benkomo ukuba bengadeli ekufuyeni.
“Balimi lingadeli ukufuya amaBrahman, alula ukugcinakala njalo akhula masinyane ube suzithengisela, uzitholele imali yakho.
“Abangakangeni ekufuyeni inkomo, lingesabeli khatshana futhi lolwazi siyalwabela abalesifiso sokufuya inkomo ukuze sithole inyama eyenelayo elizweni lethu.
“Lingesabeli khatshana kodwa mbijana mbijana uyabe ulokhu uthola ulwazi, lomhlambi lawo uyabe ulokhu ukhula zize zicine sezigcwele isibaya.
Ngikhuthaza abanye abafuyi ukuthi bafuye ngesibindi ukuze senelise ukuthengisa inyama yohlonzi kuleli kunye lasemazweni angaphandle kwelizwe,”
kuphetha uDkt Dlodlo.
