Online Reporter
Bhekimpilo Tshalibe
AMAPHOLISA akoBulawayo aseveze ukuba adinga indoda eleminyaka yokuzalwa engu 32, evela ePumula South, koBulawayo esilesikhathi ingabonakali.
Kubikwa uMongameli Phiri wacina ukubonakala ngoZibandlela lonyaka, lapho asuka ngakibo kodwa wangaphenduki. UMongameli umnyama ngokombala, ulomzimba omncane njalo mude okungaba yi-1,6 metres. Wacina ukubonakala egqoke i t-shirt elombala oyi grey, i-jean elombala oyi-blue kanye lamathenisi amhlophe.
Kusenjalo amapholisa aphinde aveza ukuba adinga uCarlos Jiyane (22) ongaziwayo ukuthi ungaphi.
Kubikwa uCarlos Jiyane wacina ukubonakala mhlaka 29 Mpalakazi nyakenye. uCarlos umnyama, ulomzimba olingeneyo njalo mude okungaba yi -1,68m. Kubikwa wacina ukubonakala egqoke ijakhethi elombala obomvu kanye lebhulugwe le-jean elilombala oyi-blue.
Intatheli ikhulume lobambele isikhulumi samapholisa u-Assistant Inspector Nomalanga Msebele, ovumileyo ukuthi udaba olunje lufikile endlebeni zabo.
“Sicela ongaba lolwazi olungasinceda sithole abantu laba abangabonakaliyo ethinte amapholisa ePumula ku (0292) 418234 kumbe abikele amapholisa aseduze laye,” kuphetha u-Assistant Inspector Msebele.
