Online Reporter
Kunengi esikulandisileyo ngomuzi weNdebele kodwa kasikuphutshanga, ngakho-ke lamuhla sizaphatha okunye okwasalayo singakaqhubekeli phambili.
Imikulu ibekwa ngemuva kwezindlu zokulala ngesizatho senhlonipho; ukuze omama baqhube imisebenzi yabo bekhululekile.
Omunye umbono onanzwayo nxa kusakhiwa umkulu yibuduze lezibayeni lapho okugcinwa khona ukudla. Kuzananzelelwa ukuba umkulu kamama udaleka nxa esekhutshwe emasekweni kagogo.
Izibuya zicinela ngemuva kwezindlu zonke ngesizatho senhlonipho ephathelane labomama. Ngaphandle kokuba yindawo ephathelane lokusebenza kwemikulwini, omama bayisebenzisa ekusitheleni nxa behlamba lanxa belahla amanzi.
Uthango lomuzi lugoqela umuzi wonke luhambela emaphethelweni eguma. Izibaya zibekwa phambidlana, entshonalanga komuzi, kusenzelwa impilakahle yekhaya. Lokhu kubekwa, kwenqabela ukuba umoya wezibaya ungahatshazi usiza ngekhaya. Lokhu kusekelwa yikuba umoya wande ukuvunguza uthutsha empumalanga usiya entshonalanga.
Izibaya ziluhlangothi lwabobaba njengoba nje izibuya ziluhlangothi lwabomama. Obaba basithela ezibayeni nxa belahla amanzi. Ukubaluleka kwenhlangothi zesilisa lezesifazana kwenza abahloniphanayo bengaficani kubi.
Ubabamkhulu: Uyinsika yomuzi; ubukhona bakhe buyawuzimazisa buwenze ube lesithunzi. Uhlanganisa umuzi lamadlozi osendo ngoba nguye ophatha umthethelo. Ulomoya omuhle emuntwini wonke ngenxa yenhlakanipho yobudala bakhe.
Kungumlandu wakhe ukukhuza lokweluleka abephula umthetho/isiko. Nguye oweluleka abazukulu abangabafana ngamabanga okukhula abayabe bengena kuwo. Ubacebisa ngokuthomba lamanyathelo athathwayo. Abasentangeni yokuthatha ubacebisa ngemizi efaneleyo, elabantu abalobuntu, njalo ebaxwayisa ngemizi elumelayo okumele bayixwaye. Ungumahluleli wendaba zomuzi.
Ugogo yena uzimazisa umuzi ngesithunzi sakhe. Ugoqa izimilo zabazukulu ngokubethela izinganekwane. Nguye oweluleka abazukulu abangamankazana ngezibanga zokukhula abangena kuzo. Uludlawu lwamantombazana ebadaleni, ezindabeni zokukhomba kwabo. Ulesandla esikhulu ekupheni umlayo ekhaya.
Ubaba uselela inswelo zemuli ezigoqela ukudla lezambatho. Unakekela impilakahle yemuli. Usebenza imisebenzi yangekhaya enzima efuna amandla omuntu wesilisa. Izibonelo: ukugamula, ukugebha lokwakha. Uqondisa abantwana ngokubakhuza lokubeluleka. Ubaba yinhloko yomuzi ekutshoneni kukababamkhulu.
Umama uselela imuli ukudla. Wondla imuli ngokudla okutshiyeneyo akuphekayo. Unakekela impilakahle ngokubona ngokuhlanzeka kwemuli, ikhaya lempahla esetshenziswayo. Ufundisa abantwana abangamankazana imisebenzi yesifazana. Uqondisa izimilo zabantwana. Ulusizo ekudaleni impahla yomuzi eyelukwayo lethungwayo.
Abantwana abangabafana balithemba lokuba usendo alufi, luqhubekela phambili. Balusizo emisebenzini yekhaya efana lokwelusa leminye enjalo. Amankazana aluncedo ngokwelekelela umama emsebenzini efana lokuthanyela, ukugezisa imiganu, ukukha amanzi, ukutheza, njalonjalo.
