Online Reporter
Nkosilathi Sibanda
ISIKHULUMI samapholisa elizweni lonke uCommissioner Paul Nyathi ukhuthaze inkokheli zamabandla ezokholo ukuthi zisebenzisane labomthetho ukuze kube lemihlangano elokuthula, evikelekileyo ngesikhathi sekhefu lePhasika.
Ikhefu lePhasika liqala ngoLwesihlanu kuliviki njalo lonyaka ngalelolanga ilizwe lizabe linanza uZibuse.
Kumbiko wakhe, uComm Nyathi uthe amapholisa azabopha ziqine ukuze enqabele ubudlwangudlwangu.
“Umphakathi ukhuthazwa ukuthi usebenzisane lamapholisa ngesikhathi sekhefu likaZibuse langePhasika. Sizabe sisenza imikhankaso yokulimukisa ngobugebengu lokuphepha emigwaqeni elizweni lonke,” kutsho uComm Nyathi.
Uthe bazafaka ama-roadblocks njalo lezimota ezingekho emthethweni, okungemelanga zihambe emigwaqweni, zizathathwa. Abatshayeli labo bakhuthazwe ukuthi balandele imithetho.
“Abatshayeli bezimota ezithwala umphakathi akumelanga bathwale abantu abanengi kakhulu njalo kumele baqinisekise ukuthi izimota zabo zilungele ukuba semgwaqweni. Sinxusa umphakathi ukuthi ungatshiyi imizi ingelabantu abagcinileyo. Lalabo abahamba
isikhathi eside bakhuthazwa ukuthi basebenzise uhlelo lwethu lokuvikela izindlu.”
UComm Nyathi uxwayise abantu ukuthi bahlele indlela abavakatsha ngazo kulesikhathi njalo benqabele ukugada izimota ezingavunyelwa ukuthwala abantu.
“Sikhuthaza abantu ukuthi bengagadi izimota ezingavunyelwa ukuthwala ngoba bakhona asebebanjwe inkunzi, bathathelwa impahla ngokwenza lokhu.
“Sixwayisa njalo ukuthi abantu bengahambi endaweni ezilomumbu, utshani obukhulu lasegangeni,” ngu Comm Nyathi lo.
