Online Reporter
Yintatheli kaMthunywa
UMPHATHISIKOLO weKumalo Primary School, uStella Mhlanga, ubotshwe ngamapholisa izolo esolwa ngecala lokutshontsha imali yesikolo lesi.
Icala leli, livele ngemva kokuba kukhitshwe umbiko wenhlolisiso ejulileyo yezingwalo zemali.
UMhlanga ubotshwe lezinye izisebenzi zesikolo ezine.
Abahlanu laba bavalelwe esitokisini ngoMvulo ngehola lesibili emini, enkambeni yamapholisa yeDrill Hall koBulawayo.
Udletshana lokutshontshwa kwezimali luqale ukuvela ngesikhathi i-School Development Committee (SDC) ibika ngokungahambi kuhle kwengwalo zemali ngoNhlolanja. Lokhu kwadala ukuthi abachwayisisa amabhuku ezimali abavela kuHulumende
bayehlolisisa ngokusetshenziswa kwezimali.
Loba isikhulumi samapholisa koBulawayo, uAssistant Inspector Nomalanga Msebele, engenelisanga ukuphawula ngaloludaba, abafakazi abaqotho abangamapholisa baveze ukuthi uMhlanga labanye bakhe babotshwe ngamapholisa ohlangothi lweCommercial Crime Unit. Idokethi yakhona ngu-CRB 6312/025.
UMhlanga kaqalisi ukuthinteka emacaleni nanko ngo-2023 wetheswa icala lobugwelegwele lokuhlukumeza esinye isisebenzi esikolo. Ngomnyaka odluleyo uphinde wamiswa umsebenzi, kusenziwa uphenyo eKumalo Primary School, kodwa wabiselwa emsebenzini ngemva kwesikhathi esifitshane.
Ngo-2015 waxotshwa eMagwegwe Primary School kulandela ukukhonona kwabazali, okwadala ukuthi ukungezwani lokhu kuxazululwe ngamapholisa e-riot.
