admin
YiNtatheli kaMthunywa
UMSINDO weBarbourfields uzaphela sekutheni?
Umbuzo lo uyinsindabaphenduli ngoba kusegcekeni ukuthi amapholisa eZimbabwe Republic Police labalandeli beHighlanders sekuyingwe lenja.
Abalandeli beHighlanders abazihluphi ngokuthi sebephosele ithimu yabo emalahleni ngokwenza udlame olungakaze lubonakale kumbali yenguqu enkundleni yeBarbourfields.
Baphikelele ngokuthi aluba amapholisa ‘‘ahlonipha’’ abalandeli njengansuku zonke, kwakungasoke kuvuke udlame.
Umdlalo lo osemlonyeni yabantu wawudibanise iHighlanders leChicken Inn njalo waphetha kungutshiki lobhanqa 1-1.
Kuphenduke kwaba yisiphithiphithi ezihlalweni zeSoweto eBF ngeSonto edluleyo ngesikhathi abasekeli beHighlanders behlasela amapholisa okwadala ukuthi kulimale elinye ilunga leZRP elatshaywa ngeyinye indoda kukhangele wonke umsekeli webhola.
Umpholisa lo, wehluleka ukuzivikela njalo okwamangalisayo yikuthi abanye bakhe abangamapholisa bagoqa izandla bebona ukubhulwa komunye beseduzane. Ubufakazi bama-vidiyo lemfanekiso buyakuveza lokhu.
Ngenxa yalokhu, iBosso izakhupha inhlawulo yezigidi zamadola.
Iphephandaba likazulu lingene ezitaladeni zakoBulawayo lakhuluma labasekeli benguqu, ikakhulu labo ababekhona mhla wesehlakalo sokutshaywa kwepholisa.
Abasekeli abanengi bavumelana ukuthi kukhona okumele kuqondiswe kumapholisa ngakho awafunde ukuhlonipha abanikazi bomdlalo — bona abalandeli.
“Sonke esasihlezi eSoweto sabona kakuhle okwenzakalayo. Kulepholisa elahlukumeza omunye wethu kabuhlungu, engibona angathi yikho okwacunula abanye,” kutsho uSiphephile Dlomo ongumsekeli weHighlanders aphinde abengusomabhizimusi ozimele yedwa koBulawayo.
UDlomo uthe kwakungeke kwenzakale mahlayana ukuthi umdlalo weBosso leChicken Inn ubelomsindo.
“IChicken Inn ifana lokuthi ngumakhelwane wethu kuHighlanders. Lokhe saqala ukudlala layo, akukaze kwenzakale okunje. Yikho ngisithi amapholisa ehluleka ukuzibamba.”
UNicholas Sithole olilunga leBosso ‘‘Heart and Soul’’ ubike ukuba isiqalo sodlame savela kubonompembe.
“Uyabona iqiniso kumele liphume njengoba linjalo. Abantu okumele basolwe okuzwayo ngonompembe.
Bayayithanda into yabo yokuthi bancitshe ithimu imbekwa esegcekeni. Kulabasekeli babonompembe abasebenza emaceleni, babephethe besekela amacala esenzakala kubadlali endaweni yokuthi baphakamise i-flag.
“Asikhumbuleni ukuthi loba abasekeli benza ihlazo, batshaphaza umdlalo omuhle, amapholisa labonompembe kumele bazi ukuthi ababukeli labalandeli bamathimu adlalayo baqakathekile. Phela imali ivela kithi esingenayo,” nguDlomo lo.
Omunye umsekeli oseVictoria Falls uMike Dube obebukele lumdlalo uthe: “Hayi, angazi ukuthi ababukeli babedleni.
Kanti pho ipholisa latshayelwani? Izizatho zinengi njalo lawo amapholisa sekungathi awafuni ukufunda isimo sabantu ababukela ibhola behlezi eSoweto.”
Imbono le ihambelana leyenengi labasekeli, abavumelana ukuthi amapholisa eZRP lamalunga eHighlanders kumele ahlale phansi akhumisane umlotha.
Umaqhuzu weHighlanders uNdumiso Gumede ucele uMthunywa ukuthi azise abalandeli beqembu labo ukuthi bazibambe.
“Maviki wonke sihlala sibeka umbiko kumaphephandaba ukuthi abalandeli bethu bazibambe. Ibhola ngumdlalo wethu sonke. Umsindo owenzakala eBarbourfields usithathela imali enengi. Ukujika ibhanana phakathi kwenkundla kusihlawulisa imali.”
UGumede ukhalaze ngokuthi sebedinge baswela ukuthi amapholisa ehlulwa yini njengoba egcwala abemanengi mhla kudlala iHighlanders.
Kusenjalo uKennedy Ndebele umaqhuzu wePremier Soccer League losihlalo uPeter Dube sebethumele umbiko ngodlame lweMagumeni.
“Inhlanganiso yePremier Soccer League ibika ngokucunuka okukhulu ngodlame olwenzakala kumdlalo owawuphakathi kweHighlanders FC le Chicken Inn FC mhlaka 14 kuNcwabakazi.
“Udlame lobukliwi kumdlalo wenguqu akufuneki. Ababukeli bomdlalo kumele bazikholisele ngokuthula. Ngakho sithanda ukubikela bonke abathandi lababukeli bomdlalo ukuthi bancedise amapholisa ukubamba labo abenza umsindo,” kutsho iPSL.
UNdebele uthe sebezwe kanengi ngokubotshwa kwezikliwi kodwa azijeziswa.
“Asikaze sizwe ngokuthi labo ababotshelwe udlame bahanjiswe emthethwandaba. Sicela amapholisa aqhubeke ngokubamba izephulamthetho lezi.”
Online Reporter