adminYiNtatheli kaMthunywa
KULANDELA ukwehluleka kwabadlali bakuleli kumijaho yamaOlympics, labo abazazi belethalenta lokugijima sebekhuthazwe ukuthi bananzelele ukuthi sekulenguquko enkulu kulumdlalo.
Ingcitshi kwezokuqeqetshwa kwemidlalo zibika ukuthi kunengi okumele kufundwe ngabaqeqetshi lalabo abakhethwa ukuthi bayemela isizwe kuzigaba eziphezulu zemincintiswano.
IZimbabwe iphenduke kumaOlympics ingela ngitsho imendulo.
UPaul Ncube, ongomunye wabaqondisi bezokuqeqetsha kunhlanganiso yeNational Athletics Association of Zimbabwe (NAAZ) uthe kuyayangisa ukuthola abadlali bakuleli besehluleka ukumelana labavela kwamanye amazwe loba kusaziwa ukuthi balethalenta njalo bayenelisa ukwenza ngcono.
“Ngemva kokuhlolisisa indlela abagijimi bakuleli abenze ngayo kumaOlympics, sibelokudana njalo kuhle ukuthi sicebise abadlali lokukufundisa ababalisi kakutsha.”
Uqhubeke wathi: “Inengi lamaqula alolonga abadlali abagijimayo alazi lutho ngokuguquka komdlalo we-athletics.
Lokhu sakubona kumincintiswano eminengi.
Umdlalo we-athletics uqala ezikolo ngakho ababalisi kumele bafundiswe ngokugcweleyo. Umdlalo uyatshintsha lemithetho isiyehlukile kuleyakudala. Kubalulekile ukuthi silungisise indlela ababalisi abalolonga ngayo ithalenta elincinyane,” kutsho uNcube.
Kusiyaphela lumnyaka inhlanganiso yeNAAZ ibambene leyeZimbabwe Olympic Committee ikhangelelwe ukuthi ifundise abaqeqetshi bomdlalo wokugijima encedisana lenhlanganiso yeBulawayo Athletics Board.
Kumbiko othunyelwe iphephandaba likazulu, umgcinisihlalo weBAB uManuel Mpofu uthe bahlose ukufundisa ababalisi abangaphansi kwezinhlanganiso zabaphathi bezikolo ze-primary (iNaph) leze-secondary (iNash).
“Ababalisi kumele bathole izithupha zaphezulu, yikho nje siqala ukuthi sifundisane nge-athletics. Sikhangelele ukuthi kuze abantu abanengi, hatshi ababalisi kuphela.”
“IBAB ikhuthaza ukuthi izikolo zithumele ababalisi bazo kuzifundo zomdlalo. Kuzakuba lamanye amakhosi njalo lapho esizafundisa ngemithetho yomdlalo ehlala itshintsha njalonje.”
Online Reporter