Online Reporter
Mbulelo Mpofu
IQEMBU lembube, Amaqaqa, selihlanganyele lomculi weJiti uBaba Harare engomeni entsha yothando ethi Rese, ekhuluma ngendlela impilo yendoda eguquka ngayo ngemva kokuthola uthando lweqiniso.
Ingoma le okwamanje isisabalale enkundleni zokuxhumana ebulenijini njalo isihloko sayo sichazwa ngokuthi, Konke, ngesiNdebele. Ividiyo yalingoma iqophwe yabuya yaqondiswa yi-Afri Art Studios njalo isivele isithole ukubukwa okudlula 129 000 kuYouTube kungakapheli iviki.
Ilunga le-Amaqaqa uMohau Ncube, uthe ingoma le ikhuluma ngomuntu othola uthando lweqiniso ngemva kokudlula ezinhluphekweni zothando.
“Ingoma le ikhuluma ngomfana owayesedubekile ngothando ngemva kokubona ubuhlungu obunengi. Kodwa ngemva kokuhlangana lentombi enhle, uthola uthando lweqiniso oluphinda lumvuselele ithemba empilweni yakhe,” kutsho uNcube.
UNcube uthe ukusebenza loBaba Harare kwakuyindlela yokutshengisa ukuthi abantu bangahlangana basebenze ndawonye kungelani lokwehlukana kwemihlobo.
“Ukusebenza loBaba Harare bekumnandi kakhulu. Yena ngokwakhe wasidinga ngobuqotho, savuma ukusebenza laye ngoba uyahlonipha abanye abaculi njalo uyazimisela emsebenzini wakhe. Sihlanganise amasiko ehlukeneyo kule ingoma, kwaphuma umsebenzi omuhle kakhulu, okutshengisa ukuthi nxa abantu besebenza ndawonye bangafeza okunengi.
“Kuvidiyo, uBaba Harare ugqoke impahla yesintu samaNdebele njalo wacula ngesiNdebele ngendlela etshelelayo. Lokhu kukhuthaza ubunye phakathi kwamaNdebele lamaShona ngoba siyabona ukuthi nxa sibambisana singathola uthando lokuthula,” kutsho uNcube.
Ngaphandle kwengoma ethi Rese, uBaba Harare uyaqhubeka lokusondeza umsebenzi wakhe kubalandeli bakhe bakoBulawayo. Usanda kuhlangana lomculi we-Amapiano uBlack Diva engomeni ethi, Abroad.
