YiNtatheli kaMthunywa
UKUTSHISA kwelanga ngezinga eliphezulu kulezinsuku sekukhudumeze izikhwama zabanye osomabhizimusi koBulawayo, asebethengisa izigubhu zamanzi e-500ml nge-$1 ngasinye.
Intengo yamanzi la, ejwayele ukuba phakathi kwe-US$0.20 kusiya ku-US$0.30 kumbe 5 Rand ezitolo lasezitaladeni.
Ukusilela kwamanzi lokhu kubonakele kusukela ngempelaviki edluleyo lapho ilanga elitshise laze lafika phose phezulu kwelinganiso se- 36 degrees celsius koBulawayo, kuthi kwezinye indawo esabelweni seMatabeleland North litshise laba yi-40 degrees Celsius.
Ukutshisa kwelanga ngokutsho kwengcitshi zomumo womkhathi iMeteorological Services Department (MSD), kubangelwa yisimo sesomiso esibizwa ngokuthi yi-El Nino.
Kubikwa abantu banathe amanzi aze aphela ezitolo ezinengi edolobheni. Kusiya fika ilanga langeSonto, ezinye izitolo besezingasela izigubhu zamanzi athengiswayo.
Ama-fridge agcina amanzi ezitolo lezi ebetshaya umoya. Obekukhona obekunatheka ezitolo ngamanamunede lochago lamahewu. Kulandela ukusilela kwamanzi lokhu, abathengisi ezitaladeni bathole ithuba lokuthi bazitholele imali.
Amanzi abesetholakala ezitaladeni, okufaka impilo zabantu engozini, njengoba kungaziwa ukuthi amanzi la athethwe endaweni ezihlanzekileyo na? Kubikwa abanye abathengisa ezitaladeni besebethengisa amanzi abawathatha empompini zekhansili, kuthi abanye kunakanelwa ukuthi bakha ezibholaneni
Ngokudingisisa kwentatheli yephephandaba likazulu, izitolo ziqalise ukubeka imigoqo kunani elingathengwa ngumuntu oyedwa ngasikhathi sinye.
Phezulu kwalokhu, abanye osomabhizimusi bahle bakhweza intengo, okwenze kwaba nzima ukuthi abantu bawathenge njengoba intengo isikhuphuka nsuku zonke.
Omunye wabosomabhizimusi oxoxe lentatheli uzibonele ithuba lokwenza imali.
“Wena kunguwe ubuza kwenzani? Kayisimi ngedwa engibone ithuba elihle kangaka. Ilanga liyatshisa njalo amanzi la athegiswa esezigubhini kawatholakali. Abantu bayawadinga ngenxa yokutshisa.
“Mina labanye bami sigijimele eBelmont sawoda amakhathuni amanengi, sawathengisa esitaladeni.
Sibelusizo ebantwini abakade bewadinga,” kutsho usomabhizimusi osakhulayo lo.
Omunye umaneja wesitolo esincane esiphakathi kwenye i-mall esidikidikini sedolobho uqinisekise ukuthi kulokusilela kwamanzi njalo intengo isikhweziwe ngenxa yokwanda kwabantu abawadingayo.
“Okubuzayo kuliqiniso sibili. Kulokusilela kwamanzi. Khathesi kangilawo emafirijini. Abantu abanengi sebewadinga kakhulu amanzi kulezinsuku, yikho lokhu okubangele ukusilela kwawo ngempelaviki,” kutsho umaneja lo, othe unguMnumzana Clever Mathe.
Kusenjalo, abe-MSD baqhubeka bexwayisa uzulu ngesimo somkhathi esingajwayelekanga ngalesi isikhathi somnyaka. Kubikwa kuzakuba lokutshisa kwelanga okwedlulisileyo, izulu libe lilutshwana njalo kwesinye isikhathi libuye lilamandla lomoya omkhulu.
