YiNtatheli kaMthunywa
KULEZELAMANI ezivela eRusape ezife ngemva kokunikwa itshefu ‘ngunina’.
Izelamani lezi, uEmmanuel Makarimai, oleminyaka engu-14, loTanaka Makarimai, oleminyaka engu-12, balaliswa esibhedlela seParirenyatwa ngemva kokugula.
Bobabili bafele esibhedlela.
Unina wabantwana laba, ongasuye obazalayo kodwa osethethwe nguyise, uVimbai Mushana, usolwa ngokufaka itshefu ekudleni.
Kubikwa nguye owabasa esibhedlela kodwa kusukela lapho akwaziwa ukuthi ungaphi.
Unina wabantwana, uLoice Jose, oleminyaka engu-31, ohlala eConcession, uthe wayehlele loMushana ukuthi abantwana basuke eRusape baye eMbare besiya eConcession.
“Savumelana ngoLwesibili olwedluleyo ukuthi uVimbai uzalanda abantwana eRusape abalethe eMbare besiya eConcession,” kutsho uJose.
“NgoLwesithathu ngangibalindele eMbare Musika njengokwesivumelwano sethu, kodwa kabazange bafike.
“NgoLwesine ngathola ucingo oluvela eParirenyatwa Police Post lungazisa ukuthi abantwana balaliswe esibhedlela njalo bayakhupha.
“Ngaya esibhedlela ukuyabona ukuthi banjani. Ngithe ngifika ngatshelwa ukuthi uTanaka kasekho, kodwa uEmmanuel wayesalwela impilo yakhe. Ngemva kwemizuzu emilutshwana laye uEmmanuel wafa.”
