admin
Cornelius Luphahla
AKUBIZWA ozwayo eMagwegwe Terminus ngoMgqibelo lapho iqembu likaCliff Jeans leleSons of a Son azabe esethula amadlalade awo amatsha encedisana labanye abaculi abatshiyeneyo.
Amaqembu la adume ngomdumo we-hip- hop kanye leAfro-pop azabe esenza adume ngakho kwezokuzithokozisa emphakathini encediswa ngamanye amaqembu atshiyeneyo.
UMthunywa ukhulumisane loCliff Jeans oveze ukuthi umkhosi lo ngowokwethulela abalandeli babo amadlalade abo abatsha bencediswa ngabanye abaculi.
“Umkhosi lo siwuhlele ngenhloso yokukhipha amadlalade ethu. Elami idlalade engilikhiphayo ngelithi, Another Level elilengoma ezingu-16, ngakho sibone kungcono ukuthi sihlangane leqembu leSOS ngoba lalo liyabe likhipha idlalade lalo. Umkhosi lo uzaqala ngehola lakuqala ngemva kwemini enkulu uze uyephela ngehola lesihlanu ntambama.
“Emkhosini lo kuzabe kulabaculi abagoqela uMawiza ocula i-hip-hop, uSticks ocula ikwaito, uC Four kanye labanye abaculi abanengi. Okunye njalo emkhosini lo abantu bazabe bengena mahala,” kutsho uCliff Jeans.
UKennedy Amos omunye wabaholi beqembu leSOS uthe bona njengeqembu bazabe bekhipha idlalade elilengoma ezisamdlalo.
“Emkhosini lo sizabe sikhiphela uzulu idlalade lethu elilengoma ezisamdlalo engingakubiza ngokuthi yi-Extended Play. Idlalade lakhona lithi, Sivela kude okuchaza imbali yethu kwezomculo kanye leyempilo.
“Sizathatha njalo lelithuba ukuthengisa amadlalade ethu kanye lawabanye abaculi abazabe bekhona ngalelolanga,” kuchaza uAmos.
Ekhuluma lentatheli uNever Zhuga ongomunye wabaholi beqembu leSOS uthe bajonge ukuvezela uzulu iziphiwo abalazo bakhuthaze lentsha ukuthi ingazeyisi.
“Thina njengabaculi abatsha sijonge ukuvezela intsha ukuthi ingeyisi iziphiwo zayo kayiziveze emphakathini ukuze izithuthukise. Lokhu sizakuveza ngokubatshayela ingoma zethu ezizabavezela ukuthi asizeyisi ngeziphiwo zethu,” kuphetha uZhuga.
Online Reporter