admin
IPHEPHANDABA likazulu kule iviki libuyisela uzulu kwezomculo nanko phela siliphathele ijaha elidala uMduduzi Golide otshaya leqembu le-The United African.
Abafana laba abatshaya umculo we-rumba abagidi nje benza izimanga, kuthi emlonyeni bakhipha uluju kuphela.
Othanda ukuzwa ngaleliqembu nansi ingxoxo ejulileyo phakathi komholi waleliqembu uMduduzi Tshuma (MT) lentatheli yephephandaba likazulu uCornelius Luphahla (CL).
CL: MfokaGolide akutsho ngamafitshane mayelana lembali yakho leyeqembu lakho njengomculi?
MT: Mina ngazalelwa esigabeni seMpandeni ePlumtree okuyikho engakhulela khona ngabuya ngafunda eMpandeni Primary ngathi ngiqeda uGiredi 7 ngayafunda eSt Francis Tshitshi Secondary School okuyikho engaqala khona ukucula. Ngalesisikhathi ngangisacula umculo wembube. Ukucula irumba ngaqala ngo2011 ngicula leqembu
Abafana Bokuthula and The Proud Africans.
CL: Lokhe waqala ukucula sowakhipha amadlalade amangaki njalo wawakhipha nini?
MT: Lokhe ngaqala ukucula ngedwa sengakhipha amadlalade amathathu leDVD eyodwa kodwa ngesikhathi ngisacula leqembu laBafana Bokuthula sakhipha idlalade elithi Ma Africa Amahle ngo2011. Kwathi ngo2013 ngaphuma kuleliqembu ngavula elami ngakhipha idlalade elithi Uthando Luyinkinga, ngabuya ngakhipha elithi
Wavumelani elika2014, kwathi lonyaka ngo2016 ngakhipha elinye njalo elithi Dear Mama. I-DVD engiyikhiphileyo igoqela amadlalade ami wonke njalo ngiyikhiphe ngoNtulikazi lonyaka ithi Dear Mama.
CL: Ingoma zakho uvame ukuzidlalela ngaphi njengeqembu elitsha kwezomculo werumba?
MT: Njengeqembu elisakhula ingoma zami ngandise ukuzidlalela emikhosini etshiyeneyo egoqela emitshadweni, emadilini okuzalwa kanye lakweminye imidlalo. Kwesinye isikhathi ngiyake ngenze ama-shows endaweni ezehlukeneyo.
CL: Kungani inengi labaculi bakuleli bethanda ukuculela kweleSouth Africa njengawe?
MT: Okwenza inengi lethu liculele kweleSouth Africa yikuthi akudingi mali enengi kakhulu ukukhipha idlalade nxa useSouth Africa njalo abapheki bakhona balipheka libe mnandi kakhulu kulabakithi. Okunye njalo yikuthi kweleSouth Africa abantu bakhona bayasekela ezomculo kakhulu kulabakithi njalo kulendawo ezinengi zokuthengisela umculo kulakithi.
CL: Njengeqembu elisasungula licula libangaki kuqembu lakho Golide?
MT: Okwakhathesi kuqembu lami sicula sibabili ngiloLikhwa Mpofu kuthi abanye abasincedisayo siyababhadala imali. Ngalokhu sisadinga abantu abazahlala eqenjini.
CL: Abantu bathini ngomculo wakho njengoba uthi iqembu lenu lilibambe libabili?
MT: Abantu bayawujabulela kakhulu umculo wethu okokuthi ngeke uvume ukuthi iqembu leli silibambe sibabili.
Ngitsho ngoba bayasifonela bencoma umsebenzi wethu abanye besibiza endaweni ezehlukeneyo ukuthi sizobajabulisa.
CL: Njengoba uthi abantu bayawusekela kakhulu umculo wakho ukhangelele ukubenzelani lonyaka?
MT: Lonyaka ngikhangelele ukuvakatshela endaweni ezehlukeneyo kanye lakwelakithi koMthwakazi ngibatshayela ingoma zami.
CL: Bunzima bani oyake uhlangane labo njengomculi njalo nkuthazo bani oyipha abaculi abasasungula?
MT: Ubunzima engiyake ngihlangane labo kwezomculo yikuswela imali yokuzithuthukisa kanye lokuthi abanye abantu bayangintshontshela umculo wami bawuthengise ngentengo ephansi okwenza ukuthi nxa sengiwuthengisa ngentengo ewulingeneyo abantu bengasawuthengi.
Kubaculi abasacathula ngikhuthaza ukuthi baqinisela noma kunzima njalo basebenzise ngobuqotho iziphiwo zabo.
Online Reporter