Online Reporter
Nkosilathi Sibanda
IZIMBABWE Volleyball Association (ZVA) isibike ngokukhethwa kwabaqeqetshi abatsha kumaqembu elizwe. Inhlanganiso le ithe ukukhethwa lokhu kugxile kumaqembu amakhulu abesilisa labesifazana lamaqembu ama-
Under-20 abafana lamantombazana azancintisa emidlalweni yeRegion 5.
Eqenjini labesilisa elikhulu, umqeqetshu ngu-Itsanangu Abu Basuthu ozancediswa nguMunyaradzi Mavima loGift Chirebvu. Isikhundla sikamaneja weqembu siphiwe uFarai Mboto, kuthi uMunyaradzi Chita ngumqondisi wenhlalakahle yamaqembu wonke.
Eqenjini labesifazana, uMemory Dube uzaba ngumqeqetshi omkhulu, esebenzisana labaqeqetshi abancedisayo uLeadme Muhlohla loPrisca Mhuru, kuthi uFebbie Dzomonda ngumphathi weqembu.
Iqembu labafana bama-Under-20 lizakhokhelwa nguKudzai Bakayidza ongumqeqetshi omkhulu, encediswa nguMthulisi Mlilo. UDaniel Ruka abe ngumaneja.
Kwelamantombazana ama-Under-20, uPatricia Muzokomba ngumqeqetshi omkhulu, esekelwa nguNyashadzashe Takawira. Okhethwe ukuba ngumaneja nguBarbara Dzoriwa.
I-ZVA ikhuthaze bonke abakulumdlalo ukuthi basekele abaqeqetshi abatsha.
“Inhlanganiso icela ukuthi wonke umuntu anikeze usekelo olupheleleyo kubaqeqetshi abakhethiweyo.
Ukubambisana, ukukhuthazana lobudlelwano kuqakathekile ukuze amaqembu ethu aphumelele njalo enze kuhle emidlalweni yonke,” kutsho iZVA.
Inhlanganiso le iveze ithemba lokuthi abaqeqetshi laba bazanceda ukuthi amaqembu akuleli enze ngcono emincintiswaneni ezayo.
