admin
YiNtatheli kaMthunywa
UKUJOMBA kwamaqembu enguqu kuleli sekudale ukuthi abuyele emuva ngokulandela isinqumo seFifa Club Licensing esaphawulwa yinhlanganiso ekhokhela lumdlalo eyeFifa ngomnyaka ophelileyo.
Ekuqaleni kwalisizini inhlanganiso yePremier Soccer League yabikela amaqembu ukuthi kuzamele aguqule indlela akhokhelwa ngayo alandele lokhu okufunwa yiFifa.
Ngaphansi kwezinqumo zeFifa Club Licensing Regulations, amaqembu enguqu kumele aqhatshe izisebenzi ezithile ezigoqela umaqhuzu kanye lalo ozabona ngokukhitshwa kwembiko.
IFifa ithi ifuna ukuba amaqembu amaligi aqale ukuba lamahofisi, ukwakha inkundla zawo lokunye okuzatshengisa ukuthi inguqu iqhutshwa ngobungcwethi baphezulu.
Ithimu inye ngayinye kumele iqhatshe njalo izisebenzi ezizakhokhela ibhizimusi lethimu, okutsho ukuba sekumele kube labomaqhuzu, izisebenzi zemahofisini ezifundele lumsebenzi.
Amaqembu ahlawulelwa ngamankampani lawo acetshiswa ukuthi ehlukane lokunamathela amankampani la.
IPSL, ngokuxwayiswa yiFifa, yabika ukuba izikhundla zenkokheli kumaqembu afana njengala kumele zicaciswe, zehlukaniswe lalezo ezamankampani asekela ithimu ngemali.
Okwamanje amathimu abalisa iHwange, iFC Platinum, IZPC Kariba, iChicken Inn leHow Mine alenkokheli ezisebenzela amankampani akhipha imali kumathimu la.
Umbono weFifa yikuthi amathimu enguqu akhokhelwe njengamabhizimusi, njengalokho okwenzakala kumaqembu amaligi aphezulu kwamanye amazwe.
UMthunywa uyakuveza ukuba kuleli, amathimu akuligi yeCastle athatha isikhathi sawo ukuthi alandele isinqumo lesi.
Akwaziwa kumbe adelela iPSL loba yona inhlanganiso ephethe umdlalo umhlaba wonke.
Ambalwa amathimu akubone kufanele ukuthi aqhatshe izisebenzi ezintsha. IHighlanders ngeyinye yamathimu amalutshwane kuligi aseqalisile ukulandela imithetho emitsha le.
IBosso iqhatshe umaqhuzu wayo ngesizini edluleyo uNdumiso Gumede. IFC Platinum leHwange ngezinye eseziguquke ngokulandela okufanayo.
Inkokheli zamathimu ezibuzwe ngokulandela isinqumo seFifa, zithe inkinga ezibhekane layo ngeyokusilela kwemali.
Amathimu abalisa ukuthi kunzima ukuqhatsha ezinye izisebenzi, ukwakha inkundla ezintsha lokuba lamahofisi.
“Inguqu yethu ayilamali. Akula muntu ongaziyo lokhu. Amanye amathimu alahlekelwa yimali nxa esiyadlala ngakho ukuqhatsha abantu akusoke kubelula,” kutsho enye inkokheli yethimu yakoBulawayo eyale ukuqanjwa.
Esinye isiphathamandla seHwange sithe: “Indaba ekhona ngeyokuthi asilamali. Aluba inguqu yethu ingenisa imali ezatholwa ngamaqembu, ngabe kudala saqedelana lakho. Khathesi sithembele kubalandeli bethu.
“Ama-regulations eFifa kuyakhanya ukuthi ahlose ukuthuthukisa inguqu yamaqembu akumaligi kodwa ukuwalandela kuzathatha isikhathi.”
Ekhuluma loMthunywa uKennedy Ndebele umaqhuzu wePSL uthe amathimu onke atshelwa njalo ayazi ukuba kumele alandele isinqumo seFifa.
“Umbiko sawuthumela sibili. Njengenhlanganiso yamathimu, iPSL isalindele ukubona ukuthi amaqembu ayalandela isinqumo seFifa Club licensing esitsha. Sikhuthaza amaqembu ethu wonke ukuthi ancedise ekuthini siphakamise inguqu yethu,” kutsho uNdebele eqeda umkhosi wePSL obukhangele ezomthetho lokuthula kunguqu edolobheni leKadoma.
Online Reporter