admin
INGCITSHI yokubhukutsha kuleli uKirsty Coventry uzakuba semlonyeni yabanengi kumncintiswano wama-Olympic ka2016, uMthunywa uyakuveza lokhu.
UMaSiziba okwamanje usephakamise ubungcitshi bokubhukutsha kumncintiswano eminengi eNorth Carolina, kweleMelika.
Ebabaza kubulembu bakhe bukaTwitter, ngokuzilungiselela phambili komkhosi wamaOlympics ka2016, uCoventry ukuncintisana lentshantshu kanye lokusebenza labaqeqetshi bephezulu sekumfake kusigaba sokuthi agijimise igolide.
“Ngiqhuba kakakuhle, kuyangijabulisa lapha. Ngendlela engizizwa ngayo ngilesiqiniseko sokuthi ngizakwenza kuhle kumaOlympics azayo.
“Angikhohlwa njalo abalandeli bami kanye lezihlobo lapha ekhaya.”
Ekuqaleni kwakhe ukulungiselela eseMelika, uCoventry uncedisane leqembu lababhukutshi eleSwimMac Team Elite, okuyilona atshona esebenza lalo.
“Sengichithe isikhathi eside ngiseZimbabwe njalo kangisoze ngikhohlwe ngayo. Ngilesikhathi eside sibili ngihlala eMelika kodwa kangizake ngiyehlala eNorth Carolina. Indawo leyo intsha lakimi njalo kuyangijabulisa ukuthi lami ngibe yingxenye yethimu elolwazi ngezokubhukutsha,” kutsho uMasiziba.
Uveze njalo ukuthi uyaludinga kakhulu usekelo lwenzalo yeZimbabwe kulo lonke uhambo lomncintiswano wamaOlympics kusukela ekulolongeni kuze kufike isikhathi azaphatheka ngaso emncintiswaneni lo. — Ubulembu
Online Reporter