Online Reporter
Fungai Muderere
UMUTSHO othi amandla endoda kawapheli sibonakala sihambelana lempilo kaKudakwashe “Nkembe” Mahachi, odlale ngendlela ethinte inhliziyo zabalandeli beqembu leHighlanders emdlalweni weJairos Jiri Charity Cup enkundleni yeBarbourfields ngeSonto.
IHighlanders inqoba 1-0 kulumdlalo.
UMahachi ungene emdlalweni sekusele imizuzu elitshumi ukuthi uphele umdlalo, kodwa utshiye enze okukhulu sengathi ubekhona yonke imizuzu engu-90.
Loba esekhulile emdlalweni, kazange atshengise ukukhathala. UNkembe utshengise ubungcwethi bakhe ngebhola enyaweni, ehlanganisa ithalenta lolwazi.
Abalandeli beBosso bakujabulele kakhulu ukubona umdlali lo ephinda ukugqoka isikipa seqembu. Ubakhumbuze ngeminyaka eyedluleyo lapho ayengomunye wabathokozisa inkundla edlalela iqembu.
Kubukeka sengathi isizini ezayo ingaba lithuba lokuthi uNkembe azilungiselele kakutsha, aphinde akhe uthando labalandeli beqembu akhula kulo.
Ngemva kokuphakamisa inkezo yakhe yokuqala emelane le-Dynamos, uMahachi uthe kuseza ezinye izinsuku zenjabulo kule isizini.
“Ngithanda ukubonga umqeqetshi kunye leHighlanders ngokungipha elinye ithuba lokuza ukuzotshengisa ithalenta lami,” kutsho uMahachi.
Uqhubeke wathi: “Le yinkezo yami yakuqala nginqoba iDynamos lokhe ngaba ngumdlali. Ngijabule kakhulu. Siyajabula, kodwa isizini entsha khona izaqala.
“Siliqembu elihlanganisa abadlali abatsha labadala. Kumele sisebenze nzima njengeqembu ukuze sizuze okunengi. Ziyeza ezinye insuku zenjabulo kuleliqembu lonyaka.”
